الماتىدا كۆي تارالۋىنىڭ الدىن الۋ جونىندەگى جەدەل شتابتىڭ كەزەكتى وتىرىسىندا قالا اكىمى باقىتجان ساعىنتايەۆتىڭ توراعالىعىمەن سانيتارلىق-ەپيدەميولوگيالىق جاعدايدى تۇراقتاندىرۋ جانە قالا تۇرعىندارىن ۆاكسينالاۋ قارقىنى جونىندەگى شارالار قارالدى.
ينفەكسيانىڭ تارالۋ قارقىنى بويىنشا قالانىڭ «قىزىل» ايماقتان «سارىعا» وتۋىنە قاراماستان، شەكتەۋلەر تاعى ءبىر اپتا بويى ساقتالادى. مەگاپوليستە اۋەجايلاردا، تج جانە اۆتوۆوكزالداردا، سونداي-اق وقۋ ورىندارىندا پروفيلاكتيكالىق شارالاردى كۇشەيتۋ جالعاسۋدا، دەپ حابارلايدى Almaty-akshamy.kz
كورشىلەس رەسەيدەگى ەپيدەميولوگيالىق احۋالدىڭ ناشارلاۋىنا بايلانىستى الماتىلىقتار سانيتارلىق-ەپيدەميولوگيالىق شارالاردى ساقتاۋدى جالعاستىرىپ، ىندەتكە توسقاۋىل قويۋ ءۇشىن ۆاكسينالانۋ قارقىنىن كۇشەيتۋلەرى ءتيىس.
رەسەي مەن ەۋروپا ەلدەرىنەن كەلگەندەر دەرتتىڭ كەزەكتى وسۋىنە جول بەرمەۋ ءۇشىن باقىلاۋعا الىنادى. بۇگىن ءموبيلدى بريگادالار اۋەجايدا، تەمىرجول ۆوكزالدارىندا جانە اۆتوۆوكزالداردا كەزەكشىلىك ەتەدى. اۋەجايدا حالىقارالىق ۇشىپ كەلۋ زالدارىندا تەمپەراتۋراسى بار جولاۋشىلاردى انىقتاۋ ءۇشىن 7 ستاسيونارلىق بايلانىسسىز تەپلوۆيزور ورناتىلعان، كەلگەندەرگە ساۋالناما جۇرگىزىلەدى. تاعى ءبىر تەپلوۆيزور ىشكى رەيستەر زالىندا ورنالاسقان. بۇدان وزگە، اۋەجاي Ashyq جوباسىنا قاتىسۋشى، وندا وسى جىلدىڭ 21 مامىرىنان باستاپ «قىزىل» مارتەبەسى بار 257 جانە «سارى» مارتەبەسى بار 54 ادام انىقتالدى.
ب. ساعىنتايەۆ جۇقتىرۋ ديناميكاسىنىڭ تومەندەۋىنە قاراماستان، سانيتارلىق دارىگەرلەر مەن ەپيدەميولوگتاردىڭ شەكتەۋ شارالارىن ساقتاۋ جونىندەگى ۇسىنىستارىنا ءجىتى نازار اۋدارۋ كەرەكتىگىن اتاپ ءوتتى. الماتىدا كۆي بويىنشا جاعداي وپتيميستىك بولجام بويىنشا دامۋدا، كۇن سايىن 231-دەن 300-گە دەيىن جۇقتىرۋ وقيعاسى تىركەلەدى. دەگەنمەن، دەرتتىڭ اسقىنۋى جانە تاعى ءوسۋى مۇمكىن، ويتكەنى ۆيرۋس ۇنەمى وزگەرۋدە.
سەبد مالىمەتتەرى بويىنشا، قالا تۇرعىندارى كوبىنەسە ساۋدا وبەكتىلەرىندە كوروناۆيرۋس جۇقتىرادى – 34%، قوعامدىق كولىكتە – 24%، وتباسىلارمەن بايلانىستا – 18% جانە بازارلاردا – 9%.
شەكتەۋ شارالارى ەلدىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس 7 كۇن بويى جالعاسادى. باسەڭدەۋ نەمەسە كۇشەيتۋ ماسەلەلەرى قالاداعى ەپيدەميولوگيالىق احۋالدىڭ دامۋىنا بايلانىستى قارالاتىن بولادى.
ازىرگە مونيتورينگتىك توپتار بۇزۋشىلىقتاردى انىقتاۋ جۇمىستارىن جالعاستىرادى. مىسالى، وتكەن اپتاداعى 18-25 قازان ارالىعىندا الماتىدا كۇندىزگى جانە تۇنگى تەكسەرۋلەر بارىسىندا كارانتيندىك شەكتەۋلەردى بۇزعان 12 كاسىپكەرلىك نىسانى انىقتالدى. 6 زاڭدى جانە 77 جەكە تۇلعا اكىمشىلىك جاۋاپكەرشىلىككە تارتىلدى، 47 قوعامدىق كولىكتى تەكسەرۋ بارىسىندا ماسكا رەجيمىن بۇزعانى ءۇشىن 6 ادام جاۋاپكەرشىلىككە تارتىلدى.
مەكتەپكە دەيىنگى مەكەمەلەردى تەكسەرۋ جالعاسۋدا، ءموبيلدى توپتار 189 مەملەكەتتىك بالاباقشا مەن 38 مەكتەپكە دەيىنگى ۇيىمدى ارالادى. ماسەلەن، №154 بالاباقشادا قىزمەتكەرلەر اراسىندا ماسكا رەجيمىن بۇزۋ انىقتالدى، قاشىقتىق ساقتالماعان. №№ 25، 48 بالاباقشالاردا ماكيروۆكالار جاسالماعان. № 59 جانە 148 بالاباقشالاردا بولمەلەردى ىلعالدى جيناۋ جانە دەزينفەكسيالاۋ جونىندەگى تالاپتار بۇزىلعان.
تەكسەرۋ كەزىندە 7 جوو-دا سانيتارلىق نورمالاردىڭ بۇزىلعانى انىقتالدى، سانيتايزەرلەر جەتىسپەدى، رەسيركۋلياتورلار بولماعان. كەيبىر جاتاقحانالاردا وقشاۋلانعان ستۋدەنتتەر بولمەلەرى جوق. جەكەلەگەن جوو-لاردا وقۋشىلاردىڭ Ashyq جوباسى بويىنشا ىشكە كىرۋى باقىلاۋعا الىنباعان.
بۇزۋشىلار تىزىمىندە – لوگيستيكا جانە كولىك اكادەمياسى، قازاق ينجەنەرلىك-تەحنولوگيالىق ۋنيۆەرسيتەتى، سانكت-پەتەربۋرگ گۋمانيتارلىق كاسىپوداقتار ۋنيۆەرسيتەتى، قازاقستان-بريتان تەحنيكالىق ۋنيۆەرسيتەتى، قازاق سپورت جانە تۋريزم اكادەمياسى، UIB حالىقارالىق بيزنەس ۋنيۆەرسيتەتى جانە كاسپيي ۋنيۆەرسيتەتى بار.
ونىڭ ۇستىنە، الماتىداعى ستۋدەنتتەردىڭ جالپى سانىنىڭ 57%-ى ۆاكسينالانعان. جوو وقىتۋشىلارىنىڭ اراسىندا ۆاكسينالانعاندار – 90%. ەپيدەميولوگتار جاستار مەن ورتا جاستاعى ادامدار ينفەكسيانىڭ نەگىزگى تاسىمالداۋشىلار دەپ سەندىرەدى. ولاردىڭ ايتۋىنشا، 20-39 جاس ارالىعىنداعى قالالىقتاردىڭ 31%-دان استامى دەرتتى ءجيى جۇقتىرادى، ال سوڭعى ەكى اپتادا وسى جاس توبىنداعىلاردىڭ دەرتى شامامەن 4%-عا وسكەن.
الماتىدا كوروناۆيرۋس جۇقتىرعاندار سانى بۇرىنعىسىنشا جوعارى، بارلىعى 176 727 ادام اۋىرىپ قالدى. ستاسيوناردا 1205 ادام ەمدەلۋدە. ايتا كەتەرلىگى، كوروناۆيرۋسقا قارسى ءبىرىنشى كومپونەنتپەن 987 305 الماتىلىق ەگىلدى.
جەدەل شتاب الماتىلىقتاردى كۆي-عا قارسى ۆاكسينادان بەلسەندى وتۋگە تاعى دا شاقىردى، ويتكەنى ۇجىمدىق يممۋنيتەتتىڭ قالىپتاسۋى شەكتەۋلەردى كەزەڭ-كەزەڭىمەن الىپ تاستاۋعا جانە قالىپتى ءومىر سالتىنا ورالۋعا مۇمكىندىك بەرەدى.