وڭىرلىك كوممۋنيكاسيالار قىزمەتىندە ق ر تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى تاۋداعى قازىرگى جاعداي مەن قىسقى ماۋسىمدا ساقتالۋى ءتيىس قاۋىپسىزدىك امالدارى تۋرالى بايانداپ بەردى، - دەپ حابارلايدى aqshamnews.kz.
ق ر تجم رجقج قۇتقارۋ بولىمشەسىنىڭ باس قۇتقارۋشىسى ۆاديم پاكتىڭ ايتۋىنشا، بيىل قىستا وتكەن جىلدارعا قاراعاندا تاۋعا قار قالىپتى جاۋعان، الايدا قالىڭ قار جاۋعان كەزدە قار كوشكىنى بولۋى دا ابدەن مۇمكىن.
«بيىل قار سيرەك جاۋادى، ءبىراق مول تۇسەدى. قار جاۋعاننان كەيىن بەس–التى كۇن بويى تىك بەتكەيلەرگە، قارلى جىراعا شىعىپ، قاردىڭ استىندا تۇرۋعا بولمايدى، سەبەبى كەز كەلگەن ۋاقىتتا قار كوشۋى ىقتيمال»، – دەيدى.
سپيكەردىڭ ايتۋىنشا، ەڭىستىگى 30–45 گرادۋستان اساتىن بەتكەيلەر، قار باسقان جەرلەر مەن قار جاۋعاننان كەيىنگى جەل جاق بەتكەيلەر ەڭ ءقاۋىپتى ايماقتارعا جاتادى ەكەن. سوندىقتان توپ بولىپ جۇرگەن كەزدە قايسىسى بولسىن ارا قاشىقتىقتى ساقتاپ، ءقاۋىپتى جەرلەردەن بىر-بىرلەپ، اسا ساقتىقپەن ءوتۋى ءتيىس.
«قاۋىپسىزدىك تەحنيكاسىن ساقتاماي، جولعا دايىندىقسىز شىعىپ، قار كوشىپ، ۇسىك شالۋى مۇمكىن ەكەنىن كوبى ەسكەرە بەرمەيدى»، – دەپ ايتتى ۆاديم پاك.
سوڭعى جىلدارى قۇتقارۋ قىزمەتىنىڭ تاۋداعى جۇمىسى كۇشەيگەن.
«تاۋدا قۇتقارۋ قوستارى مەن دەپولار ورناتىلىپ، جاڭا كەزەكشىلىك پۋنكتتەرى اشىلىپ جاتىر. بۇل جەدەل ارەكەت ەتىپ، ازاماتتاردىڭ ومىرىنە دەر كەزىندە اراشا ءتۇسىپ، قاۋىپسىزدىگىن قامتاماسىز ەتۋگە مۇمكىندىك بەرەدى»، – دەدى سپيكەر.
ءوز كەزەگىندە ءادىلحان بالتاباي قىسقى ماۋسىم باستالعالى بەرى تاۋلى ايماقتا شامامەن 20 قۇتقارۋ وپەراسياسى جۇرگىزىلىپ، 25 ادام قۇتقارىلعانىن، بەس ادامعا پسيحولوگيالىق كومەك كورسەتىلگەنىن حابارلادى.
«قىس كەزىندە مۇلدە ءقاۋىپسىز ايماقتاردى ءبولىپ كورسەتۋ قيىن، سەبەبى تاۋلى جەرلەردىڭ ءارقايسىسى وزىنشە ءقاۋىپتى. اسىرەسە دايىندىقسىز كەلىپ، بىردەن تاۋعا بەت الاتىن تۋريستەر كوپ ءقاۋىپ تۋدىرادى»، – دەپ اتاپ ءوتتى ول.
سونىمەن قاتار سپيكەر الماتىنىڭ تاۋلى ايماقتارىنداعى قولدانىستاعى قۇتقارۋ پۋنكتتەرى تۋرالى اقپارات بەردى.
«قازىرگى تاڭدا قالانىڭ مامانداندىرىلعان تاۋلى ايماقتارىندا ءتورت قۇتقارۋ بولىمشەسى جۇمىس ىستەيدى، وندا قۇتقارۋشىلار تاۋلىك بويى كەزەكشىلىك اتقارادى. پۋنكتتەر تۇيىق-سۋ لاگەرى اۋماعىندا، «مەدەۋ» تاۋ-شاڭعى كۋرورتىنىڭ اۋماعىندا، ۇلكەن الماتى شاتقالى مەن شىبىندىساي (بۋتاكوۆكا) شاتقالىندا ورنالاسقان»، – دەيدى ءادىلحان بالتاباي.
قۇتقارۋشىلار تاۋعا شىعار الدىندا وزىمەن بىرگە ازىق-تۇلىك قورىن، دارى-دارمەك، جىلى كيىم، اۋىستىراتىن اياق كيىم، بايلانىس قۇرالدارى، GPS-قۇرىلعىلار مەن پاۋەربانك الىپ ءجۇرۋ قاجەتتىگىن، سونداي-اق مارشرۋت پەن قايتىپ ورالاتىن ۋاقىتى تۋرالى جاقىندارىنا ەسكەرتىپ وتىرۋ كەرەكتىگىن ايتتى. قار كوشكىنى ءقاۋپى بار جەرلەر تۋرالى وزەكتى اقپارات قازاقستان رەسپۋبليكاسى توتەنشە جاعدايلار مينيسترلىگىنىڭ سايتىندا جاريالانعان.