ول اقشاعا سەكسۋالدىق قىزمەت كورسەتۋگە دايىن كەلبەتتى قىزداردى ىزدەپ، باي كليەنتتەردى تارتۋمەن اينالىسقان.
جەڭگەتاي ءبىر ساعاتتىق قۇنى 500 مىڭ تەڭگەدەن باستالاتىن «كەزدەسۋدەن» 40% وزىنە الىپ وتىرعان، دەپ حابارلايدى Almaty-akshamy.kz
Polisia.kzء-تىڭ اقپاراتىنا ساي، ىشكى ىستەر مينيسترلىگى الەۋمەتتىك جەلىلەردەگى «جابىق» توپتاردى انىقتادى. ولار ارقىلى الماتى قالاسىندا قالتالى ەر ادامدار ءۇشىن ينتيمدىك جانە «ەسكورت-سۇيەمەلدەۋ» قىزمەتتەرىن كورسەتەتىن مودەلدىك كەلبەتى بار قىزداردىڭ قاتىسۋىمەن «جەكە» سەكس-كەشتەر ۇيىمداستىرىلعان.
ءىىم ۇيىمداسقان قىلمىسقا قارسى كۇرەس دەپارتامەنتىنىڭ قىزمەتكەرلەرى كولىكتەگى پوليسيا دەپارتامەنتىنىڭ ۇققكب-مەن بىرلەسىپ، سول توپتاردىڭ ۇيىمداستىرۋشىسى مەن اكىمشىسى – 25 جاستاعى الماتىلىق قىزدى ۇستادى.
ول قىزدارعا «دەمەۋشىلەردى» تابۋعا، الەمدى كورۋگە جانە ءومىرىن جەڭىلدەتۋگە ۋادە بەرگەن. توپقا كىرۋ 300 اقش دوللارىن قۇراعان. كورسەتىلگەن جەڭگەتايلىق قىزمەتى ءۇشىن كۇدىكتى كليەنتتەن تۇسكەن اقشانىڭ 40%-ىن وزىنە الىپ وتىرعان. ال قالعانىن قىزمەت كورسەتكەن قىز العان. «كەزدەسۋدىڭ» قۇنى ءبىر ساعات ءۇشىن 500 مىڭ تەڭگەدەن باستاپ، ءارتۇرلى باعامەن ولشەنگەن. قارجى مونيتورينگى اگەنتتىگىمەن بىرلەسىپ، دەرەكتەردى تالداۋ ناتيجەسىندە كۇدىكتىنىڭ 2022 جىلعى قاراجات اينالىمى انىقتالدى. ول 209 ملن تەڭگەدەن استام سومانى قۇرادى.
سەكس-بيزنەستى ۇيىمداستىرۋشى ءوز قىزمەتىن جاسىرۋعا تىرىسقان. ءوزىن Instagram الەۋمەتتىك جەلىسىندە 100 مىڭنان استام وقىرمانى بار تابىستى مودەل ءارى بلوگەر رەتىندە كورسەتكەن. رەسمي تۇردە ەش جەردە جۇمىس ىستەمەگەن. ءتىنتۋ بارىسىندا كۇدىكتىدەن قىلمىستىق «بيزنەس» تۋرالى جازبالارى بار كۇندەلىك، جاڭا جانە ساتىپ الىناتىن جىلجىمايتىن مۇلىككە قۇجاتتار، اق ءتۇستى ۇنتاق زاتتىڭ قالدىقتارى بار قالتا ايناسى، ەسىرتكى زاتتارىن تۇتىنۋعا ارنالعان بۇرالعان اقشا، Lexus ES 250 جانە Toyota Camry 70 ماركالى اۆتوماشينالار، سونداي-اق سالماعى 1،72 گرامم بولاتىن «مەفەدرون» تابىلىپ، تاركىلەندى.
سونىمەن قاتار جەزوكشەلىكپەن اينالىسۋ ءۇشىن وسى «جابىق» توپتاردا تۇراتىن «ەليتالىق ەسكورتشىلار» پوليسيا بولىمىنە جەتكىزىلدى. پروكۋراتۋرا كەلىسىمى بويىنشا ق ر قك-نىڭ 309-بابىمەن «جەزوكشەلىكپەن اينالىسۋعا پريتوندار ۇيىمداستىرۋ جانە جەڭگەتايلىق» جانە 297-بابىمەن «ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ» سوتقا دەيىنگى ءىس قوزعالدى. كۇدىكتى قاماۋعا الىندى. تەرگەۋ جالعاسۋدا.