بۇگىن 21 ناۋرىز - حالىقارالىق قۋىرشاق تەاترى كۇنى.
حالىقارالىق قۋىرشاق تەاترى كۇنى 2003 جىلدىڭ 21 ناۋرىزىنان بەرى تويلانىپ كەلەدى. وسىعان وراي الماتى قالاسىنداعى قۋىرشاق شەبەرلەرى كاسىبي مەرەكەلەرىن اتاپ وتۋدە، دەپ حابارلايدى اlmaty-akshamy.kz.
الماتى قالاسىنىڭ مەملەكەتتىك قۋىرشاق تەاترى شەبەرلىك ساباعىن ۇيىمداستىرىپ، ەرەسەكتەر مەن بالالارعا قۋىرشاقتاردىڭ جاسالۋ جولىن، اكتەرلەردىڭ ويناۋ ادىستەرىن كورسەتتى.
اكتريسا ەركەش ءجۇنىسوۆانىڭ ايتۋىنشا، قۋىرشاقتاردى قولمەن قيمىلداتىپ، دىبىستاۋ، ولارعا جان ءبىتىرۋ - ۇلكەن ونەر.
"قۋىرشاقتاردىڭ ءتۇر-تۇرى بار. ولاردى قولعا كيىپ، قول ارقىلى ويناتۋ كەرەك. تەاتر قۋىرشاقتارىنىڭ ءارقايسىسى ءارتۇرلى تەحنولوگيامەن جاسالادى. ساۋساققا ارنالعان شاعىن قۋىرشاقتان باستاپ، قولعا كيگىزىلەتىن، ءجىپ ارقىلى باسقارىلاتىن تۇرلەرىن كورەرمەن جاقسى بىلەدى. ساحناداعى تانىمال ەرتەگى كەيىپكەرلەرى تەاتر شەبەرلەرىنىڭ قولىنان شىققان. وسى شەبەرحانادا قاراپايىم زاتتاردان باستاپ كەرەمەت ونەر تۋىندىلارى جاسالادى"، - دەيدى اكتريسا.
88 جىلدىق تاريحى بار الماتى قالاسىنىڭ مەملەكەتتىك قۋىرشاق تەاترى – ەلىمىزدەگى ەڭ ءىرى ونەر ۇجىمدارىنىڭ ءبىرى. تەاتر ۇجىمى بۇگىندە تالانتتى ارتيستەر مەن قۋىرشاق شەبەرلەرىنىڭ، رەجيسسەرلەردىڭ، سۋرەتشىلەردىڭ بىرنەشە ۇرپاعىن تاربيەلەپ شىعاردى. ەلىمىزدە جانە شەتەلدە وتكەن حالىقارالىق، رەسپۋبليكالىق تەاتر فەستيۆالدەرىندە بيىك بەلەستەردى باعىندىرعان ۇجىمنىڭ العا قويعان باعىتى مەن باعدارى دا ايقىن. ول – قازاقتىڭ قۋىرشاق تەاترى ونەرىن وركەندەتۋ، كەشەگى مەن بۇگىنگى ءومىر اراسىن ونەردىڭ بيىك شىڭى ارقىلى شىنايى كورسەتە ءبىلۋ.
بۇگىندە مەملەكەتتىك قۋىرشاق تەاترىنىڭ قويىلىمدارىنا ارنالعان 500-دەن اسا قۋىرشاق بار ەكەن. تەاتر ساحناسىندا جىل سايىن 5 جاڭا سپەكتاكلدىڭ تۇساۋى كەسىلەدى. ياعني، رەپەرتۋار تولىعىپ، جاڭا كەيىپكەرلەردىڭ سانى كوبەيىپ وتىرادى.
