الماتىدا ءماسليحاتتىڭ كەزەكتەن تىس سەسسياسىندا دەپۋتاتتار قالانىڭ جاڭا قۇرىلىسى ەرەجەلەرىن بەكىتتى، دەپ حابارلايدى aqshamnews.kz
بۇل ەرەجەلەر نۇكتەلى قۇرىلىسقا، تاۋ بوكتەرلەرىنىڭ، جاسىل ايماقتار مەن اۋلالاردىڭ يگەرىلۋىنە جول بەرمەۋ ماقساتىندا اكىمدىك تاراپىنان ازىرلەنگەن. بۇعان دەيىن قۇجات ساراپشىلارمەن جانە جۇرتشىلىقپەن كەڭىنەن تالقىلانعان بولاتىن.
ءماسليحات دەپۋتاتتارىنىڭ الدىندا ءسوز سويلەگەن قالالىق جوسپارلاۋ جانە ۋربانيستيكا باسقارماسىنىڭ باسشىسى نۇرلان بورانبايەۆ جاڭا ەرەجەلەر قۇرىلىسقا قاتاڭ شەكتەۋلەر ەنگىزۋدى، كوپپاتەرلى تۇرعىن ۇيلەردى قابىلداۋدا مەملەكەتتىك ورگانداردىڭ باقىلاۋىن كۇشەيتۋدى، سونداي-اق ساۋلەت-قۇرىلىس باقىلاۋ ورگاندارىنىڭ فۋنكسيالارىن كەڭەيتۋدى قاراستىراتىنىن اتاپ ءوتتى.
جاڭا ەرەجەلەر قانداي شەكتەۋلەردى كوزدەيدى؟
اباي داڭعىلى مەن ءال-فارابي داڭعىلى اراسىنداعى قۇرىلىسقا بيىكتىك شەكتەۋى بەلگىلەندى: بارلىق ۇلگىدەگى عيماراتتاردىڭ بيىكتىگى 9 قاباتتان جانە 35 مەتردەن اسپاۋعا ءتيىس.
ەرەكشەلىك تەك قوعامدىق ماڭىزى بار، ساۋلەت-ۋربانيستيكالىق نەگىزدەمەسى بار، جوبالىق شەشىمدەردىڭ ورنىقتىلىعى مەن ەكولوگيالىق تالاپتارعا ساي، ەنەرگيا ۇنەمدەۋ جانە رەسۋرس ۇنەمدەۋ تەحنولوگيالارىن قولدانۋ ارقىلى سالىناتىن بىرەگەي نىساندارعا عانا جاسالادى.
سونداي-اق، جاڭا ەرەجەلەر سەيسميكالىق ءقاۋىپتى ايماقتار مەن تاۋ بوكتەرلەرىندەگى شااج، ءال-فارابي داڭعىلى، ساين مەن جاندوسوۆ كوشەلەرىنىڭ وڭتۇستىگىندەگى قۇرىلىس ءتارتىبىن رەتتەيدى:
- تاۋ بوكتەرىندەگى، سونىڭ ىشىندە ەڭىس بۇرىشى 15 گرادۋستان اساتىن اۋماقتاردا قۇرىلىس سالۋعا تىيىم سالىنادى؛
- بۇرىن قابىلدانعان عيماراتتاردىڭ بيىكتىگى 12 مەتردەن جانە 3 قاباتتان اسپاۋعا ءتيىس دەگەن شەشىم بەكىتىلدى (قوعامدىق-مادەني نىسانداردان باسقا)؛
- قايتا قۇرۋ كەزىندە تەرراسالار مەن تەحنيكالىق قاباتتاردى قايتا جابدىقتاۋعا تىيىم سالىنادى.
بۇعان قوسا، قالانىڭ بارلىق اۋماعىندا III ساناتتان تومەن ەمەس تۇرعىن ءۇي سالۋ تالابى بەكىتىلەدى جانە ءار پاتەرگە كەمىندە 1 اۆتوتۇراق ورنىن قاراستىرۋ قاجەت.
نۇكتەلى قۇرىلىسقا جول بەرمەۋ جانە رەكرەاسيالىق ايماقتاردى ساقتاۋ جونىندەگى شارالار
الماتىدا تۇرعىن كۆارتالدار مەن اۋلالاردا نۇكتەلى قۇرىلىستىڭ سالىنۋ ماسەلەسى وزەكتى بولىپ وتىر. بۇرىن زاڭنامالىق تۇرعىدا جاسىل ايماقتار مەن اۋلاداعى بالالار الاڭشالارىندا قۇرىلىس سالۋعا تىيىم بولماعان جاعدايدا، جاڭا ەرەجەلەردە مۇنداي قۇرىلىسقا قاتاڭ تىيىم سالىنادى.
سونىمەن قاتار، قالانىڭ ورتالىق ماگيسترالدارىندا، الەۋمەتتىك نىساندار مەن ادامدار كوپ جينالاتىن ورىنداردىڭ ماڭىندا جانارماي قۇيۋ بەكەتتەرى مەن تەحنيكالىق قىزمەت كورسەتۋ ورتالىقتارىن سالۋعا تىيىم سالىنادى.
تابيعي قورلاردى جانە اۋلالىق رەكرەاسيالىق ايماقتاردى ساقتاۋ ماقساتىندا قۇرىلىس اۋماعىن كەڭەيتۋ ءۇشىن تابيعي لاندشافتتى وزگەرتۋگە، تاۋ بوكتەرلەرىندەگى جىرالار مەن جىلعالاردى جابۋعا، تاۋ بوكتەرىن كەسۋگە تىيىم سالىنادى.