الماتىدا «الماتى - ءبىزدىڭ ورتاق ءۇيىمىز» ناۋقانى اياسىندا قوزى كورپەش - بايان سۇلۋ كۇنىنە ورايلاستىرىلعان اعاش وتىرعىزىلدى. ءىس-شارا بارىسىندا اۋدان اكىمدىكتەرى مىڭنان استام اعاش وتىرعىزدى، دەپ حابارلايدى almaty-akshamy.kz
ەكولوگيا جانە قورشاعان ورتا باسقارماسى كوشەتتەردى قامتاماسىز ەتۋ بويىنشا قولداۋ كورسەتتى. قىلقان جاپىراقتى كوشەتتەر، سونداي-اق شاعان، ءساناعاش، قاراعاش، ۇيەڭكى، قاراعان، قايىڭ، الما جانە تەرەك بەرىلدى.
اتالعان ەكو ءىس-شارا الماتى قالاسىنىڭ بارلىق اۋدانىن قامتىدى: الاتاۋ اۋدانىندا 30 اعاش، المالى اۋدانىندا - 15، اۋەزوۆ اۋدانىندا - 200، بوستاندىق اۋدانىندا - 100، جەتىسۋ اۋدانىندا - 340، مەدەۋ اۋدانىندا - 45، ناۋرىزباي اۋدانىندا - 200 جانە تۇركسىب اۋدانىندا - 160 اعاش وتىرعىزىلدى.
ەستەرىڭىزگە سالا كەتەيىك، وسى جىلدىڭ 8 ءساۋىرى مەن 8 مامىرى ارالىعىندا قالادا «الماتى – ءبىزدىڭ ورتاق ءۇيىمىز» ناۋقانى جاريالاندى. مەگاپوليستىڭ ءاربىر تۇرعىنىن ەكولوگيالىق مادەنيەتتى قالىپتاستىرۋعا باعىتتالعان ءىس-شارالارعا قاتىسۋعا، سونداي-اق ەكولوگيالىق جوبالاردى قولداۋعا شاقىرامىز.
تولىق اقپارات almaty.kz سايتىندا جانە الماتى اكىمدىگىنىڭ الەۋمەتتىك جەلىلەرىندە جاريالانعان.
