رەسەيلىك ەرلى-زايىپتى قوس ازاماتتىعى ءۇشىن ەلدەن شىعارىلدى.
الماتى قالاسى اۋەجايىنداعى جەلىلىك پوليسيا ءبولىمى كوشى-قون بولىمشەسىنىڭ قىزمەتكەرلەرى قازاقستان رەسپۋبليكاسىنىڭ ازاماتتىق تۋرالى زاڭناماسىن بۇزعاندارى ءۇشىن رەسەي فەدەراسياسىنىڭ 69 جانە 71 جاستاعى ازاماتتارىن اكىمشىلىك جاۋاپقا تارتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ەرلى-زايىپتىلارعا قاتىستى ق ر اقبتك-نىڭ 496-بابىنىڭ 2-بولىگىمەن اكىمشىلىك ماتەريالدار تولتىرىلدى.
«الماتى قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىمەن شەتەلدىك ازاماتتارعا 5 جىل مەرزىمگە ق ر اۋماعىنا كىرۋگە تىيىم سالۋ بەلگىلەنىپ، قازاقستان رەسپۋبليكاسىنان تىس جەرگە شىعارىپ جىبەرۋ تۇرىندە جاۋاپقا تارتىلدى»، – دەيدى كولىكتەگى پوليسيا دەپارتامەنتى باستىعىنىڭ ءبىرىنشى ورىنباسارى ماديار ايتۋعانوۆ.
ەستەرىڭىزگە سالا كەتەيىك، وسى جىلدىڭ باسىنان بەرى كولىك پوليسەيلەرى قازاقستان رەسپۋبليكاسىنىڭ كوشى-قونى سالاسىنداعى زاڭناماسىن بۇزعان 986 ازاماتتى، ونىڭ ىشىندە قوس ازاماتتىعى بار 38 ادامدى اكىمشىلىك جاۋاپكەرشىلىككە تارتقان. سونداي-اق، سوت قاۋلىسىمەن 155 شەتەلدىك ەلدەن تىس شىعارىلدى.