بيىل اسكەري پروكۋراتۋرا ورگاندارىنىڭ بەلسەندى جۇمىسىنىڭ ناتيجەسىندە سوماسى 6 ميلليارد تەڭگەدەن استام مۇلىك مەملەكەتكە قايتارىلدى.
باس پروكۋراتۋرا مالىمەتىنشە، جوعارعى سوتپەن قۇنى 5 ميلليارد تەڭگەدەن اساتىن قورعانىس مينيسترلىگىنىڭ قورعانىس نىسانى قايتارىلدى، دەپ حابارلايدى Almaty-akshamy.kz El.kz-كە سىلتەمە جاساپ.
الماتى قالاسىندا كولەمى 16 مىڭ شارشى مەتردەن اساتىن 10 قويمادان، 2 اكىمشىلىك عيماراتتان، 2 وندىرىستىك سەحتان تۇراتىن مۇلىكتىك كەشەن 20 جىل بويى جەكە تۇلعانىڭ سەنىمگەرلىك باسقارۋىندا بولعان. قازىرگى ۋاقىتتا قايتا تىركەۋ ءراسىمى ءجۇرىپ جاتىر، ودان كەيىن نىسان قورعانىس قاجەتتىلىكتەرى ءۇشىن پايدالانىلادى، - دەلىنگەن مالىمەتتە.
سونداي-اق قاداعالاۋ اكتىلەرى بويىنشا قۇنى 180 ميلليون تەڭگە بولاتىن 22 جەر تەلىمى ارمياعا قايتارىلدى.
بۇدان بولەك 25 جىلدان استام زاڭسىز يەلىكتە بولعان، جالپى قۇنى 400 ميلليون تەڭگەنى قۇرايتىن 200-دەن استام قىزمەتتىك پاتەر مەملەكەت بالانسىنا قويىلىپ، ولار تۇرعىن ۇيگە مۇقتاج اسكەري قىزمەتشىلەرگە تاراتىلادى.