الماتى قالاسىندا قوعامدىق جانە جول قاۋىپسىزدىگىن ارتتىرۋ، سونداي-اق قۇقىق بۇزۋشىلىقتىڭ الدىن الۋ ماقساتىندا پوليسيا قىزمەتىندە ۇشقىشسىز ۇشۋ اپپاراتتارى قولدانىلۋدا، – دەپ حابارلايدى Aqshamnews.kz.
حالىق تىعىز ورنالاسقان، كولىك قوزعالىسى قارقىندى ءارى قالالىق ءومىر بەلسەندى ورتادا دروندار زاماناۋي ءارى ءتيىمدى مونيتورينگ قۇرالى رەتىندە پايدالانىلۋدا. ۇشقىشسىز ۇشۋ اپپاراتتارى قوعامدىق ورىنداردا، كوشە-جول جەلىسىندە، ازاماتتاردىڭ جاپپاي جينالاتىن جانە ولارعا ىرگەلەس اۋماقتاردا جالپى احۋالدى باقىلاۋعا مۇمكىندىك بەرەدى. ولاردى پايدالانۋ قوعامدىق ءتارتىپتىڭ بۇزىلۋىنىڭ الدىن الۋعا، ونىڭ ىشىندە ۇساق قۇقىق بۇزۋشىلىقتاردى انىقتاۋعا، سونداي-اق توتەنشە جاعدايلارعا جەدەل ارەكەت ەتۋگە باعىتتالعان. درونداردى پايدالانۋ ناقتى ۋاقىت رەجيمىندە بولىپ جاتقان جاعدايدىڭ وبەكتيۆتى كورىنىسىن الۋعا، ادامداردىڭ شوعىرلانۋىن، قوزعالىستاعى قيىندىقتاردى، قاۋىپسىزدىگى تومەن ۋچاسكەلەردى، اباتتاندىرۋ قاعيدالارى مەن قوعامدىق ءتارتىپتىڭ بۇزىلۋىن دەر كەزىندە انىقتاۋعا، سونداي-اق پوليسيا جاساقتارىنىڭ ارەكەتتەرىن ءتيىمدى ۇيلەستىرۋگە مۇمكىندىك بەرەدى. الماتى قالاسى اكىمشىلىك پوليسيا باسقارماسىنىڭ باستىعى سەرىك شۋمايەۆتىڭ ايتۋىنشا، زاماناۋي تەحنولوگيالار پوليسيانىڭ پروفيلاكتيكالىق جۇمىسىنىڭ اجىراماس بولىگىنە اينالۋدا.
– دروندار – ەڭ الدىمەن الدىن الۋ قۇرالى. ولار بىزگە جاعدايدى كەڭ اۋقىمدا كورۋگە كومەكتەسەدى: تەك جولداردا عانا ەمەس، سونىمەن قاتار قوعامدىق كەڭىستىكتەردە – اۋلالاردا، الاڭداردا، ادامدار كوپ جينالاتىن ورىنداردا. مۇنداعى باستى ماقسات – ءتارتىپتى ساقتاۋ، قۇقىق بۇزۋشىلىقتىڭ الدىن الۋ جانە الماتى تۇرعىندارى مەن قوناقتارى ءۇشىن ءقاۋىپسىز وردا قالىپتاستىرۋ، – دەپ اتاپ ءوتتى سەرىك شۋمايەۆ.
پوليسيا دەپارتامەنتىندە ۇشقىشسىز ۇشۋ اپپاراتتارى قولدانىستاعى زاڭناما تالاپتارىنا قاتاڭ سايكەس پايدالانىلاتىنىن جانە ولاردىڭ قىزمەتى ازاماتتاردىڭ قاۋىپسىزدىگىن قامتاماسىز ەتۋگە، قوعامدىق ءتارتىپتى قورعاۋعا، سونداي-اق "زاڭ مەن ءتارتىپ" قاعيداتىن ىسكە اسىرۋعا باعىتتالعانىن اتاپ ءوتتى.