الماتىدا قوعامدىق شتاب وكىلدەرى تىگىن فابريكاسىنىڭ قىزمەتكەرلەرىمەن كەزدەستى

ولار 5 ماۋسىمدا وتەتىن جالپىحالىقتىق رەفەرەندۋمعا قاتىستى تولىققاندى اقپارات بەردى

ساياسي جۇيەنى تۇبىرىمەن وزگەرتىپ، مەملەكەتتىك باسقارۋ ىسىنە اتسالىسۋ ءۇشىن ازاماتتارعا كەڭ مۇمكىندىكتەر بەرۋ – پرەزيدەنتتىڭ بيىلعى جولداۋىندا ايتىلعان باستامالاردىڭ نەگىزگى ماقساتى. جاڭا قازاقستاندى قۇرۋدا رەفورمالاردى جاڭارتۋ ماڭىزدى دەگەن الماتى قالالىق قوعامدىق قولداۋ شتاب مۇشەلەرى بۇگىن «كازلەگپروم-الماتى» تىگىن فابريكاسىنىڭ قىزمەتكەرلەرىمەن كەزدەستى، دەپ حابارلايدى Almaty-akshamy.kz Almaty.tv – گە سىلتەمە جاساپ.

ولار 5 ماۋسىمدا وتەتىن جالپىحالىقتىق رەفەرەندۋمعا قاتىستى تولىققاندى اقپارات بەردى. اتا زاڭعا وزگەرىس بۇل بولاشاق ءۇشىن قاجەت دەگەن پىكىردى ۇستانعان شتاب مۇشەلەرى ءار ازامات جالپىحالىقتىق داۋىس بەرۋگە بەلسەندى قاتىسىپ، ءوز تاڭداۋىن جاساسا دەيدى.

«الماتى قالالىق شتاب وكىلدەرى جەڭىلونەركاسىپ فابريكاسىنا كەلىپ تۇرمىز. بىردەن كوز قۋانتادى. قازاقتىڭ قانشاما قىز-كەلىنشەكتەرى جۇمىسپەن قامتىلىپ، 4 قابات عيماراتتىڭ ىشىندە ناتيجەلى جۇمىس ىستەپ جاتقاندىعى كورىنەدى. حالىقتىڭ كوكەيىن تەسىپ جۇرگەن وزەكتى ماسەلەنىڭ بارلىعىنىڭ باسى قايىرىلدى. سوندىقتان دا بۇگىن مىناۋ جۇمىسىمىز ناتيجەلى بولدى دەپ ويلايمىن»، – دەدى رەفەرەندۋمدى قوعامدىق قولداۋ شتابىنىڭ مۇشەسى كەنجەحان ماتىجانوۆ.