وتكەن دەمالىس كۇندەرى الماتى قالالىق پد كريمينالدىق پوليسيا قىزمەتكەرلەرى ءۇش قالتا ۇرىسىن ۇستادى.
ولاردىڭ بارلىعى قوعامدىق ورىنداردا جانە كولىكتە قالا تۇرعىندارىنىڭ ۇيالى تەلەفوندارىن ۇرلاپ جۇرگەن، دەپ حابارلايدى aqshamnews.kz. Polisia.kz-كە سىلتەمە جاساپ.
بەلگىلى بولعانداي، ۇستالعانداردىڭ ءارقايسىسى بۇرىن بىرنەشە رەت قىلمىستىق جاۋاپكەرشىلىككە تارتىلعان. قىلمىس ادامدار كوپ جينالاتىن جەرلەردە – بازارلاردا، ايالدامالاردا، قوعامدىق كولىكتەردە جاسالعان. بارلىق جاعدايدا قاسكويلەر جابىرلەنۋشىلەردىڭ قىراعىلىعىن جوعالتقان ءساتىن پايدالانىپ، جاسىرىن ارەكەت ەتكەن. الماتى پوليسياسى ازاماتتاردى ادامدار كوپ جينالاتىن جەرلەردە جەكە زاتتارىنا، اسىرەسە ۇيالى تەلەفوندارىنا، ءامياندارىنا جانە سومكەلەرىنە اسا ساق بولۋعا شاقىرادى.
- قالتا ۇرلىعى - كوشەدەگى قىلمىستىڭ ەڭ كوپ تارالعان تۇرلەرىنىڭ ءبىرى بولىپ قالا بەرەدى. ءبىز مۇنداي دەرەكتەرگە جەدەل ارەكەت ەتەمىز، ۇستالعانداردىڭ بارلىعى جاۋاپقا تارتىلادى. دەگەنمەن، قالا تۇرعىندارىنىڭ وزدەرى ساقتىق تانىتۋى ماڭىزدى - باعالى زاتتارىن ارتقى قالتالارىنا سالىپ جۇرمەۋى، سومكەلەرىن، اسىرەسە كولىكتە جانە بازارلاردا قاداعالاپ وتىرۋى كەرەك، - دەدى الماتى قالالىق پد كريمينالدىق پوليسيا باسقارماسىنىڭ باستىعى تالانت يسايەۆ.
مۇلىكتىك قىلمىستاردىڭ الدىن الۋ جانە قوعامدىق قاۋىپسىزدىكتى قامتاماسىز ەتۋ - قالالىق پوليسيا قىزمەتىنىڭ باسىم باعىتى بولىپ تابىلادى.