قازىرگى ۋاقىتتا ءاربىر ەكىنشى جۇڭگو ازاماتى ارتىق سالماقتان زارداپ شەگەدى.
بۇل جايىندا islam.kz پورتالى The Washington Post مەرزىمدى باسىلىمىنا سىلتەمە جاساي وتىرىپ ءمالىم ەتەدى، دەپ حابارلايدى aqshamnews.kz.
ۇلتتىق دەڭگەيدەگى ماسەلەگە اينالعان سەمىزدىك ىندەتىنە بايلانىستى وسىدان ءبىر اي بۇرىن وتكەن جۇڭگو كومۋنيستىك پارتياسىنىڭ قۇرىلتايىندا ارتىق سالماقپەن كۇرەسۋدى ۇلتتىق دامۋدىڭ باسىمدىعى رەتىندە جاريالاندى. ويتكەنى، سەمىزدىك ەكونوميكاعا قارتايۋ پروسەسى سەكىلدى وراسان زور سالماق سالادى. ارتىق سالماقتان بولاتىن ءتۇرلى سوزىلمالى اۋرۋلارمەن (جۇرەك-قان تامىر اۋرۋلارى، سۋسامىر، قاتەرلى ىسىك، ت.ب.) كۇرەسۋ ءوز كەزەگىندە ۇلكەن شىعىندى قاجەت ەتپەك. وسىنى ەسكەرگەن جۇڭگو باسشىلارى دابىل قاعا باستادى.
سەمىزدىك ىندەتى بۇل ەلدە شاپشاڭ ەتەك الىپ كەلەدى: امەريكا قۇراما شتاتتارىنىڭ ۇلتتىق دەنساۋلىق ساقتاۋ ينستيتۋتى سەمىزدىكتى اۋرۋلار قاتارىنا جاتقىزىپ، ۇلتتىق پروبلەما رەتىندە تانىعان 1998 جىلى جۇڭگو حالقىنىڭ تەك 8%-ى عانا ارتىق سالماقتان زارداپ شەككەن ەكەن. كەرىسىنشە ەل تۇرعىندارىنىڭ 10%-ى اشقۇرساق ءومىر سۇرگەن. الايدا، ەكونوميكانىڭ وسۋىمەن بىرگە كەلگەن بۇل ىندەتتەن، دالىرەگى، 27 جىل ىشىندە ارتىق سالماقتان بۇگىندە ءاربىر ەكىنشى جۇڭگو ازاماتى زارداپ شەگەدى. ەگەر جاعداي وزگەرمەسە، 2030 جىلى، ياعني، ءبىر ساۋساق سانىنا جەتەتىن بىرەر جىلدا جۇڭگو حالقىنىڭ 70%-ى ارتىق سالماقتان زارداپ شەگەتىن بولادى. وسىعان بايلانىستى جۇڭگو بيلىگى دەنساۋلىق سالاسىنا جىلىنا 4،25 يۋان قاراجاتتى قوسىمشا بولۋىنە تۋرا كەلەدى. بۇل سوما دەنساۋلىق سالاسىنا جۇمسالاتىن شىعىننىڭ 20%-نا تەڭ كورسەتكىش. سەمىزدىك ىندەتىنىڭ كەڭىنەن ەتەك الۋىنا الاڭداعان جەرگىلىكتى بيلىك پەن جاناشىر ورىندار ءتۇرلى شارالار قابىلداپ جاتىر. ماسەلەن، شەنجەن عىلىم جانە تەحنولوگيا ۋنيۆەرسيتەتى ستۋدەنتتەر اراسىندا ەرەكشە بايقاۋ جاريالادى – ءبىر ايدا ءبىر كەلىدەن سالماق جوعالتقاندارعا ەلەكترلى ماسساج قۇرىلعىسىن بەرۋدەن باستاپ، قوسىمشا ءبىلىم نەسيەسىن ۇسىنىپ جاتىر.