الماتىدا الداعى ۋاقىتتا شەشىلۋگە ءتيىس قالالىق كولىك سالاسىنداعى ءۇش نەگىزگى ماسەلە بار. ەڭ الدىمەن، مارشرۋتتاردى وڭتايلاندىرۋ، اۆتوبۋستار مەن تروللەيبۋستار ءۇشىن تولىققاندى ينفراقۇرىلىم قۇرۋ، سونىمەن قاتار، قاربالاس ۋاقىتتا قوعامدىق كولىكتىڭ ۇزدىكسىز جۇمىسىن قامتاماسىز ەتۋ قاجەت. قالالىق موبيلدىلىك باسقارماسىنىڭ باسشىسى ساعىندىق تەلىبايەۆتىڭ ايتۋىنشا، قازاقستاندىق نورماتيۆتەر قالانىڭ تار كوشەلەرىندە ءاردايىم مۇمكىندىك بولا بەرمەيتىن ارنايى قوعامدىق كولىك جولاقتارىن قۇرۋ ءۇشىن التى جولاقتىڭ بولۋىن تالاپ ەتەدى.
«الماتى ءۇشىن ارنايى تەحنيكالىق شارتتاردى ازىرلەپ جاتىرمىز، وسى ماسەلەنى دە قامتىعىمىز كەلەدى، سونىمەن قاتار جولاقتىڭ ەنىن ازايتۋدى ۇسىنامىز. ءقازىر ونىڭ ەنى كولىكتەر ءۇشىن 3،5 مەتر، قوعامدىق كولىكتەر ءۇشىن 4 مەتر. كوپتەگەن ەلدە جولاقتاردىڭ ولشەمى سايكەسىنشە 2،7 جانە 3،1 مەتر. قالامىز ءۇشىن دە وسىنداي پارامەتردى كوزدەپ وتىرمىز. سودان كەيىن تاڭبا سىزۋدى وزگەرتە الامىز، جولدا بوس جەرلەر قالادى، وندا ءبىز قوعامدىق كولىكتەر مەن ۆەلوجولدارعا ارنالعان جولاقتاردى جابدىقتايمىز»، - دەپ جوسپارىن ءبولىستى.
بۇعان قوسا، رايىمبەك داڭعىلىندا جىلدام ترانزيت (برت) جوباسىنا ەرەكشە نازار اۋدارىلادى. اۆتوبۋستار ءۇشىن باسىمدىقتى قامتاماسىز ەتۋ ءۇشىن ەكى جولاقتى (جولدىڭ ءار جاعىنان ءبىر) تولىعىمەن قوعامدىق كولىككە بەرۋ، ارنايى باعدارشامدار مەن رەتتەلەتىن جاياۋ جۇرگىنشىلەر وتكەلدەرىن ورناتۋ جوسپارعا ەنگەن. قۇرىلىس-مونتاج جۇمىستارى كەلەسى جىلدىڭ ەكىنشى جارتىجىلدىعىنا جوسپارلانىپ وتىر.