باستاپقى جانە تانىمال بلوگەرلەر ينتەرنەتتەگى قازاق تىلىندەگى كونتەنتتى قالاي جاساۋ جانە ىلگەرىلەتۋ جايىن تالقىلادى، دەپ حابارلايدى aqshamnews.kz
فورۋمدى الماتى قالاسى قوعامدىق دامۋ باسقارماسىنا قاراستى قوعامدىق دامۋ ورتالىعى ۇيىمداستىردى. ءبىر الاڭدا شىعارماشىلىق قاۋىم مەن مەديايندۋستريا ماماندارى باس قوستى. ساراپشىلار قازاق تىلىندەگى قىزىقتى ءارى ساپالى كونتەنتتىڭ تانىمال ينتەرنەت الاڭدارىندا جەتىسپەۋى ماسەلەسىن كوتەردى.
– بۇگىندە مەملەكەتتىك تىلدە جازىلعان پوستتار مەن ۆيدەوروليكتەر الەۋمەتتىك جەلىلەردە ءجيى شىعا باستادى، راسىندا دا جاقسى كونتەنت بار، ءبىراق ءالى دە از. كوپتەگەن تاقىرىپتار بوس تۇر. بۇنى وزگەرتۋ ءۇشىن تەك ايتۋ ەمەس، ناقتى ارەكەت قاجەت. سوندىقتان ءبىز QAZAQVISION فورۋمىن ۇيىمداستىرۋدى ۇيعاردىق. بۇل فورۋم قازاق تىلىندە ساپالى كونتەنت جاساعىسى كەلەتىندەردى جانە سالا ماماندارىن بىرىكتىردى، – دەدى شارا ۇيىمداستىرۋشىسى دامير ىسكاق.
فورۋم الدىندا Instagram جەلىسىندە ءقازاقتىلدى كونتەنتكە ارنالعان بەينەروليكتەر بايقاۋى وتكىزىلدى. ۇيىمداستىرۋشىلار ىڭعايلى بولۋ ءۇشىن ناقتى تاقىرىپ – ۇلتتىق سالت-داستۇرلەردى بەلگىلەدى. بايقاۋعا 96 جۇمىس كەلىپ ءتۇستى. ارنايى كوميسسيا ولاردىڭ ىشىنەن ۇزدىك التى ۆيدەونى ىرىكتەپ، اۆتورلارعا اقشالاي سىيلىقتار تابىستادى. جالپى جۇلدە قورى ەكى ميلليون تەڭگەگە جۋىق بولدى.
– بولاشاقتا بۇل بايقاۋعا قاتىسۋشىلار سانىن كوبەيتۋدى، ونى تەك Instagram-دا ەمەس، TikTok-تا دا وتكىزۋدى جوسپارلاپ وتىرمىز. ءبىز بۇل بايقاۋدىڭ تۇراقتى جوباعا اينالعانىن قالايمىز، – دەدى دامير ىسكاق.
بايقاۋ جەڭىمپازدارىنىڭ ءبىرى – سىرعا سالۋ داستۇرىنە ارنالعان ۆيدەوروليك تۇسىرگەن بلوگەر اقجارقىن كەرىمبەكوۆا بولدى.
– بۇل – كىشكەنتاي كەزدەن ءاربىر قىز بالا ارماندايتىن، وتە ادەمى قازاقتىڭ ءداستۇرى. بەينەجازبادا مەنىڭ سەگىز جاستاعى ءسىڭىلىم ءتۇستى. ول قۋانا كەلىستى. مەن بلوگ جۇرگىزىپ جۇرگەنىمە ەكى جىل بولدى. كونتەنتىم نەگىزىنەن بيۋتي يندۋستريا تاقىرىبىنا ارنالادى. قىزدارىمىز ءاردايىم ادەمى جۇرسە ەكەن دەيمىن. الەۋمەتتىك تاقىرىپتاعى روليكتەرىم دە بار. ءقازىر 38 مىڭ جازىلۋشىم بار، بولاشاقتا كوبەيەدى دەپ ۇمىتتەنەمىن. وسىنداي بايقاۋلار وتە ۇلكەن موتيۆاسيا بەرەدى، – دەيدى اقجارقىن.