الماتىدا «قازاقتەلەكوم» بولىمشەسىندە شۋ شىعارعان ماستى سكوچپەن وراپ تاستاۋعا تۋرا كەلگەن

الەۋمەتتىك جەلىدە «قازاقتەلەكومنىڭ» الماتى بولىمشەسىنە كەلگەن ازاماتتى ەكى ەر ادامنىڭ سكوچپەن وراپ جاتقان ءساتى تۇسىرىلگەن ۆيدەو شىقتى.

كومپانيانىڭ باسپا ءسوز قىزمەتى وقيعاعا قاتىستى تۇسىنىك بەردى، دەپ حابارلايدى Almaty-akshamy.kz Astanatv.kz-كە سىلتەە جاساپ. 

«قازاقتەلەكوم» اق باسپا ءسوز قىزمەتى حابارلاعانداي، وقيعا 4 قازان كۇنى شالياپين - بەرەگوۆوي كوشەلەرىنىڭ قيىلىسىندا ورنالاسقان كومپانيانىڭ سەرۆيس جۇيەسى پۋنكتىندە بولعان.

«كۋاگەرلەردىڭ سوزىنشە، س. ەسىمدى ازامات ماس كۇيىندە فرونت-وفيسكە كەلگەننەن باستاپ ءوزىن دۇرىس ۇستاماي، كليەنتتەر مەن قىزمەتكەرلەرگە بالاعات سوزدەر ايتقان. عيماراتتاعى ادامدار مەن بالالارعا ءقاۋىپ ءتوندىردى. ءتارتىپ بۇزۋشى قاۋىپسىزدىك قىزمەتكەرىنىڭ اۋىزشا ەسكەرتۋلەرىن ەلەمەي، ورىنسىز مىنەز-قۇلىقتار كورسەتتى. كليەنتتەر مەن ابونەنتتىك ءبولىم قىزمەتكەرلەرىنىڭ قاۋىپسىزدىگىن ساقتاۋ مەن قۇقىققا قايشى ارەكەتتەرگە جول بەرمەۋ ماقساتىندا پوليسيا كەلگەنگە دەيىن وعان ءماجبۇرلى شارالار قابىلداندى. وقيعاعا كليەنتتەر دە ءوز ءومىرى مەن دەنساۋلىعىن قاۋىپكە تىگە وتىرىپ، قاتىستى»، - دەپ حابارلادى «قازاقتەلەكوم»اق-دا.

كومپانيا، سونداي-اق، وقيعا بولعان كۇنى عيماراتتا بولعان بارلىق كليەنتتەرىنەن كەشىرىم سۇرادى.

«ءبىز ءۇشىن قىمەتتىڭ جوعارى ساپاسى، قىزمەت كورسەتۋ جانە كليەنتتەردىڭ قاۋىپسىزدىگى باستى باسىمدىق بولىپ تابىلادى. «قازاقتەلەكوم»اق زاڭگەرلەرى قۇقىق قورعاۋ ورگاندارىمەن بىرلەسىپ، جاقىن ارادا قالىپتاسقان جاعدايعا زاڭدىق باعا بەرۋى ءتيىس. كومپانيا تاراپىنان دا قاۋىپسىزدىك شارالارى كۇشەيتىلەتىن بولادى»، - دەپ اتاپ ءوتتى كومپانيادان.