ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ 90 جىلدىعىنا وراي، «قازاقستاننىڭ كىتاپ گرافيكاسىنداعى ۇلتتىق ەپوس» كورمەسىنىڭ اشىلۋ سالتاناتى ءوتتى.
بۇل ماڭىزدى مادەني ءىس-شارا كورەرمەندى كورنەكتى سۋرەتشىلەردىڭ گرافيكالىق تۋىندىلارى ارقىلى قازاق ەپوسى الەمىنە تەرەڭ بويلاۋعا شاقىرادى، دەپ حابارلايدى aqshamnews.kz.
كورمە قازاقستاننىڭ ۇلتتىق ادەبي جانە كوركەمسۋرەت مۇراسىنىڭ ماڭىزىن كورسەتۋگە، سۋرەتشىلەردىڭ جاڭا بۋىنىن تاربيەلەۋگە جانە كوپشىلىكتى قازاق حالقىنىڭ مادەني قۇندىلىقتارىمەن تانىستىرۋعا باعىتتالعان.
كورمەدە 90-عا جۋىق گرافيكالىق جۇمىس پەن ۇلتتىق ەپوستىڭ قازىنالارىن ساقتايتىن سيرەك باسىلىمدار ۇسىنىلدى. كەلۋشىلەر كلاسسيكالىق وفورتتان باستاپ، ءتۇپنۇسقا گرافيكاعا دەيىنگى ءتۇرلى كوركەمدىك تەحنيكامەن جاسالعان باتىرلاردىڭ، ارۋلار مەن دانالاردىڭ جانە ميفولوگيالىق كەيىپكەرلەردىڭ بەينەلەرىن تاماشالادى. ءار شىعارما ۇلتتىق اڭىزدارداعى ەرەكشە وقيعالار مەن ونداعى كەيىپكەرلەردىڭ وبرازىن اشىپ، سۋرەتشىلەردى ادەبي تۋىندىنى تەرەڭ تۇسىنۋگە شابىتتاندىرادى.
كورمەدەگى ەرەكشە جۇمىستاردىڭ قاتارىندا «قوبىلاندى باتىر»،«قازاق حالقىنىڭ ەپوستىق جىرلارىنا يلليۋستراسيالار»، «الپامىس باتىر»، «بوزجىگىت»، «ايمان-شولپان» جانە ت.ب. جىرلارعا ارنالعان گرافيكالىق پاراقتار مەن يلليۋستراسيالار بار. ولار جۇمىستارىندا كەيىپكەرلەردىڭ ەموسياسىن اسەرلى جەتكىزىپ، شىعارمالارعا مەرەكەلىك كوڭىل-كۇيمەن قاتار ۇستامدىلىق پەن ماعىنالىلىق مازمۇن بەرگەن.
جوعارىدا اتالعان جانە وزگە دە كوپتەگەن گرافيكالىق تۋىندىلار عاسىرلار بويى ۇرپاقتان-ۇرپاققا جالعاسىپ، قازاق حالقىنىڭ مادەني كودى مەن رۋحاني قۇندىلىقتارى ساقتالعان ەپوستارعا جاڭا كوزقاراسپەن قاراۋعا ىقپال ەتەدى.
«قازاقستاننىڭ كىتاپ گرافيكاسىنداعى ۇلتتىق ەپوس» كورمەسى كەلۋشىلەرگە قازاقستاندىق سۋرەتشىلەردىڭ شەبەرلىگىن كورسەتىپ قانا قويماي، ۇلتتىق اڭىزدارداعى عاشىقتىق، دانالىق، باتىرلىق ۇشتاسقان باي مادەني مۇرانى تاماشالاۋعا مۇمكىندىك بەرەدى.