الماتىدا اللەرگيالىق جانە تىنىس الۋ مۇشەلەرىنىڭ سوزىلمالى اۋرۋلارىنىڭ تارالۋى ارتىپ وتىر. سول سەبەپتى №1 قالالىق كلينيكالىق اۋرۋحانا بازاسىندا اللەرگولوگيا جانە پۋلمونولوگيا باعىتتارى بويىنشا ەكى قۇزىرەت ورتالىعىن قۇرۋ جوسپارلانعان. قالالىق قوعامدىق دەنساۋلىق ساقتاۋ باسقارماسى وكىلدەرىنىڭ مالىمەتىنشە، بۇل قۇرىلىمدار حالىق دەنساۋلىعىن قورعاۋ جۇيەسىندە ماڭىزدى ءرول اتقارادى، ويتكەنى №1 قكا وسى بەيىن بويىنشا ارناۋلى جالعىز مەديسينالىق ۇيىم.
2025 جىلى №1 قكا ستاسيونارىندا اللەرگيالىق اۋرۋلارمەن 1 926 پاسيەنت ەمدەلدى. دارىگەرلەر اۋرۋحانادا جاتىپ ەمدەلگەندەر سانىنىڭ ارتقانىن تىركەپ وتىر: 2024 جىلى بەيىندى بولىمشەدە 927 ناۋقاس ەم قابىلداعان.
ءبىر جىل ىشىندە اۋرۋحانانىڭ قابىلداۋ بولىمىنە 26 059 ادام جۇگىنگەن. ونىڭ شامامەن 15 مىڭى جەدەل اللەرگيالىق رەاكسيامەن، ال 3 مىڭعا جۋىعى تىنىس الۋ مۇشەلەرىنىڭ اۋرۋلارىمەن تۇسكەن. پاسيەنتتەردىڭ باسىم بولىگى اۋىر جاعدايدا شۇعىل تۇردە جەتكىزىلىپ، جەدەل مەديسينالىق كومەك پەن ستاسيونارلىق ەمدى قاجەت ەتەدى. اۋرۋحاناعا جاتقىزۋ قۇرىلىمىندا جاس جانە ورتا جاستاعى ايەلدەر باسىم.
اللەرگولوگيا جانە پۋلمونولوگيا بويىنشا قۇزىرەت ورتالىقتارى قالاداعى مەديسينالىق ۇيىمدارعا ادىستەمەلىك قولداۋ كورسەتەدى. بۇل پاسيەنتتەردى باعىتتاۋدىڭ ءبىرىڭعاي جۇيەسىن قۇرۋعا، كوپبەيىندى ستاسيونارلار مەن ەمحانالاردىڭ جۇمىسىندا زاماناۋي تاسىلدەر ەنگىزۋگە جانە الماتىنىڭ ءار اۋدانىندا ارناۋلى كومەكتىڭ قولجەتىمدىلىگىن ارتتىرۋعا مۇمكىندىك بەرەدى.
اللەرگولوگيا بويىنشا قۇزىرەت ورتالىعى اللەرگيالىق اۋرۋلاردى ەرتە انىقتاۋعا، زاماناۋي اللەرگودياگنوستيكا جانە ەمدەۋ ادىستەرىن ەنگىزۋگە، اسقىنۋلار مەن اۋرۋحاناعا جاتقىزۋ سانىن ازايتۋعا، سونداي-اق پاسيەنتتەردىڭ ءومىر ساپاسىن جاقسارتۋعا باعىتتالادى. تيىمدىلىك كورسەتكىشتەرى رەتىندە ارناۋلى كومەكپەن قامتۋدى كەڭەيتۋ، شۇعىل جاعدايدى ازايتۋ جانە سوزىلمالى اۋرۋلاردى باقىلاۋدى جاقسارتادى.
پۋلمونولوگيا بويىنشا قۇزىرەت ورتالىعى برونحيالدى استمانىڭ، ونىڭ ىشىندە اۋىر تۇرلەرىن، وكپەنىڭ سوزىلمالى وبسترۋكتيۆتى اۋرۋلارىن، ينتەرستيسيالدى وكپە اۋرۋلارىن، كوۆيدتەن كەيىنگى جاعدايدى جانە تىنىس الۋ جەتكىلىكسىزدىگىن ەمدەۋگە جوعارى تەحنولوگيالىق كومەك كورسەتۋگە باسىمدىق بەرەدى. مۇندا كلينيكالىق حاتتامالار ەنگىزىلىپ، كەڭەستىك قولداۋ كورسەتىلىپ، كۇردەلى كلينيكالىق جاعداي قاراستىرىلادى. جۇمىستىڭ تيىمدىلىگى اۋىر اسقىنۋلار مەن ءولىم-جىتىمدى ازايتۋ، اۋرۋحاناعا جاتقىزۋ مەرزىمىن قىسقارتۋ جانە اۋرۋى باقىلاۋدا بولاتىن ناۋقاستار ۇلەسىن ارتتىرۋ ارقىلى باعالانادى.
الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ ەكى اپتا ىشىندە پۋلمونولوگيالىق جانە اللەرگولوگيالىق قىزمەتتى دامىتۋ جونىندەگى جول كارتاسىن ازىرلەۋدى تاپسىردى. قازىرگى ۋاقىتتا №1 قكا-دا الماتىداعى جالعىز بەيىندى بولىمشەلەر جۇمىس ىستەيدى: 30 ورىندىق اللەرگولوگيا ءبولىمى، جالپى قۋاتى 100 ورىن بولاتىن ءۇش پۋلمونولوگيا ءبولىمى، 90 ورىندىق مەديسينالىق وڭالتۋ جانە 15 ورىندىق كەۋدە بولىگىنىڭ حيرۋرگياسى بولىمشەلەرى. ستاسيوناردىڭ جالپى قۋاتى - 425 ورىن. 2025 جىلى اۋرۋحاناعا 16 198 ناۋقاس جاتقىزىلعان، بۇل وتكەن جىلمەن سالىستىرعاندا 17،5 پايىزعا كوپ.