رەسپۋبليكا سارايىندا پارلامەنت سەناتىنىڭ ءتوراعاسى ماۋلەن اشىمبايەۆ پەن الماتى اكىمى باقىتجان ساعىنتايەۆتىڭ قاتىسۋىمەن «الماتى – تاۋەلسىزدىكتىڭ التىن بەسىگى» اتتى سالتاناتتى شارا ءوتتى
بۇل كۇنى مەملەكەتتىك ناگرادالار قوعام قايراتكەرلەرىنە، جەلتوقسان ۇيىمدارىنىڭ باسشىلارىنا، مەملەكەتتىك قىزمەتشىلەرگە، عىلىم مەن ونەر قايراتكەرلەرىنە تاپسىرىلدى، دەپ حابارلايدى Almaty-akshamy.kz
تاۋەلسىزدىك كۇنى ەلىمىزدىڭ، قالانىڭ جانە ءاربىر الماتىلىقتىڭ بارلىق جەتىستىكتەرى مەن تابىستارىن قامتيدى. بۇل تۋرالى قالا اكىمى باقىتجان ساعىنتايەۆ ءوزىنىڭ قۇتتىقتاۋ سوزىندە ايتتى. رەسمي ءبولىمدى اشقان الماتى اكىمى تاريحي تۇرعىدان تاۋەلسىزدىكتىڭ بەسىگىنە اينالعان مەگاپوليستىڭ ەرەكشە ءرولىن اتاپ ءوتتى. ءدال وسى جەردە 1991 جىلدىڭ 16 جەلتوقسانىندا قازاقستان رەسپۋبليكاسىنىڭ ەگەمەندىگى رەسمي تۇردە جاريالاندى، مۇندا تاۋەلسىز مەملەكەتتىڭ نەگىزىن قالاۋشى قۇجاتتار قابىلداندى.
«الماتىدا ەل ءۇشىن ماڭىزدى شەشىمدەر قابىلداندى، كونستيتۋسيا، مەملەكەتتىك رامىزدەر قابىلداندى، قارۋلى كۇشتەر قۇرىلدى، ۇلتتىق ۆاليۋتا ەنگىزىلدى. تۇڭعىش پرەزيدەنت سايلاۋىنىڭ جالپىحالىقتىق ناتيجەلەرى دە الماتىدا جاريالاندى. 1998 جىلى تۇڭعىش پرەزيدەنت «الماتىنىڭ ەرەكشە مارتەبەسى تۋرالى» زاڭعا قول قويدى»، - دەدى باقىتجان ساعىنتايەۆ جانە ەلباسىنىڭ «الماتىنى تاۋەلسىزدىكتىڭ التىن بەسىگى» دەگەنىن اتاپ ءوتتى.
«ەل پرەزيدەنتى قاسىم-جومارت توقايەۆ سول قايعىلى وقيعالاردان كەيىن تۋرا بەس جىل وتكەن سوڭ تاۋەلسىزدىك جاريالانعانىن ايتتى. ءبىز جەلتوقسان باتىرلارىنىڭ قاھارماندىعى مەن ەرلىگىن لايىقتى باعالاپ، جان-جاقتى دارىپتەۋىمىز كەرەك. ولار - وسى ەركىندىكتىڭ العاشقى قارلىعاشتارى، جەلتوقساننىڭ كەيىپكەرلەرى. ال ەلباسى ءوزىنىڭ «تاۋەلسىزدىك تاعىلىمى» اتتى ماقالاسىندا وسىدان 30 جىل بۇرىن حالقىمىز بوستاندىق پايداسىنا تاڭداۋ جاساعانىن ايتقان بولاتىن»، - دەپ ەسكە سالدى ب. ساعىنتايەۆ.
قالا اكىمى الماتىلىقتاردىڭ، اسىرەسە، اعا بۋىننىڭ مەگاپوليستى دامىتۋعا قوسقان ۇلەسىن اتاپ ءوتتى.
«قازاقستان تاۋەلسىزدىگىنىڭ 30 جىلدىق مەرەيتويى – ءبىزدىڭ ءارقايسىمىز ءۇشىن ماڭىزدى وقيعا. وسى جىلدار ىشىندە ۇلتتىق رۋح نىعايدى، ۇرپاقتار ساباقتاستىعى دامىدى، قازىرگى تاريح پايدا بولدى. بۇگىن ءبىز «ماڭگىلىك ەل» جالپىۇلتتىق بىرلىك، بەيبىتشىلىك پەن كەلىسىم يدەياسىن ۇستانا وتىرىپ، مەملەكەت قۇرىپ جاتىرمىز. ءبىز تاۋەلسىزدىكتى ارمانداعان اتا-بابالارىمىز سالعان جولمەن كەلەمىز»، - دەدى باقىتجان ساعىنتايەۆ ءارى ەلىمىزدىڭ تاۋەلسىزدىگىن قالىپتاستىرۋعا قاتىسقان قالا تۇرعىندارىنىڭ ەرەن ەڭبەكتەرىنە العىسىن ءبىلدىردى.
سەنات ءتوراعاسى ماۋلەن اشىمبايەۆ ەل پرەزيدەنتىنىڭ تاپسىرماسى بويىنشا تاۋەلسىزدىكتىڭ 30 جىلدىعىنا ارنالعان سالتاناتتى ءىس-شاراعا قاتىستى. قالا تۇرعىندارى الدىندا سويلەگەن سوزىندە ول قازاقستان تاۋەلسىزدىك جىلدارىندا ءوزىنىڭ مەملەكەتتىلىگىن قالىپتاستىرعانىن جانە مەملەكەتتىك شەكارانى حالىقارالىق-قۇقىقتىق رەسىمدەۋدى جۇرگىزگەنىن ايتتى. سەنات ءتوراعاسى تۇڭعىش پرەزيدەنت – ەلباسى نۇرسۇلتان نازاربايەۆتىڭ ساياساتىنىڭ ارقاسىندا ەلىمىز حالىقارالىق قوعامداستىقتىڭ تولىققاندى جانە ىقپالدى مۇشەسىنە اينالعانىن، جاڭا استانا سالىنعانىن، ەلىمىزدىڭ وڭىرلەرى دە قارقىندى دامىعانىن اتاپ ءوتتى.
«تاۋەلسىزدىك جىلدارىندا الماتى دامۋعا ايتارلىقتاي سەرپىن الدى. بۇگىندە بۇل - تەك قازاقستاننىڭ عانا ەمەس، بۇكىل پوستسوۆەتتىك كەڭىستىكتىڭ ەڭ سەرپىندى دامىپ كەلە جاتقان جانە ەكونوميكالىق قۋاتتى قالالارىنىڭ ءبىرى. ەلىمىزدەگى ءاربىر بەسىنشى كاسىپكەر الماتىدا جۇمىس ىستەيدى»، - دەدى ماۋلەن اشىمبايەۆ.
سپيكەردىڭ ايتۋىنشا، الماتىدا ساپالى ادامي كاپيتال شوعىرلانعان.
«مۇندا بولاشاق ەكونوميكاسىنىڭ «جاڭعىرتۋ وزەگى»: كرەاتيۆتى تاپ پەن بەلسەندى ازاماتتىق قوعام قالىپتاستى. مەگاپوليسكە ەلىمىزدىڭ ءار وڭىرىنەن تالانتتار اعىلىپ كەلىپ جاتىر. الماتى – عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا ينۆەستيسيالار بويىنشا كوشباسشى. مەملەكەت باسشىسى اتاپ وتكەندەي، الماتىنىڭ كرەاتيۆتى ەكونوميكانى دامىتۋ جونىندەگى تاجىريبەسىن بۇكىل ەلگە تاراتۋ قاجەت»، - دەدى ماۋلەن اشىمبايەۆ.
سالتاناتتى شارا بارىسىندا ماۋلەن اشىمبايەۆ پەن باقىتجان ساعىنتايەۆ پرەزيدەنتتىڭ اتىنان ەل مەن قالانىڭ دامۋىنا ەرەكشە ۇلەس قوسقان الماتىلىقتارعا مەملەكەتتىك ناگرادالاردى تاپسىردى.
ماسەلەن، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ءىىى دارەجەلى «بارىس» وردەنىمەن ماراپاتتالدى، ەڭبەك ارداگەرى ق.بايكەنوۆكە، الماتى قالاسى بويىنشا سەبد باسشىسى ج. بەكشينگە «پاراسات» وردەنى، ءى دارەجەلى «دوستىق» وردەنى كيمەپ ۋنيۆەرسيتەتىنىڭ رەكتورى چ.ي. بەنگكە تاپسىرىلدى. مەملەكەتتىك ناگرادالارمەن عىلىم مەن ءبىلىم، مادەنيەت جانە دەنساۋلىق ساقتاۋ قايراتكەرلەرى، مەملەكەتتىك قىزمەتكەرلەر مەن قالانىڭ تىنىس-تىرشىلىگىن قامتاماسىز ەتەتىن قۇرىلىس كومپانيالارى مەن ۇيىمدارىنىڭ قىزمەتكەرلەرى ماراپاتتالدى.