2022 جىلعى 15 اقپاندا الماتىدا قازاقستان تاراپىنىڭ باستاماسى بويىنشا قازاقستان، قىرعىزستان مەن رەسەيدىڭ كەدەن جانە سالىق قىزمەتتەرىنىڭ ءۇشجاقتى كەزدەسۋى ءوتتى. كەزدەسۋ تاقىرىبى ءۇش ەلدىڭ سالىق جانە كەدەن قىزمەتتەرىنىڭ ءىس-قيمىلدارىن ءتيىمدى ۇيلەستىرۋدى قامتاماسىز ەتۋ ماسەلەلەرى بولدى. كەلىسسوزدەر دەلەگاسياسىن قازاقستان رەسپۋبليكاسى پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى باقىت سۇلتانوۆ باسقاردى، دەپ حابارلايدى اlmaty-akshamy.kz primeminister.kz سىلتەمە جاساپ.
«سوڭعى ۋاقىتتا ەاەو نارىعىندا جۇڭگو تاۋارلارىنىڭ "سۇر" اينالىمىنىڭ ۇلعايۋ ءۇردىسى بايقالۋدا. مۇنداي ءۇردىس ءبىزدىڭ ەلدەرىمىزدىڭ ۇكىمەتتەرى تاراپىنان ءتيىستى نازارسىز قالا المايدى»، — دەپ اتاپ ءوتتى ب. سۇلتانوۆ.
ول «سۇر» يمپورتتىڭ ۇلعايۋىنا الىپ كەلەتىن سىن-تەگەۋرىندەرگە: بيۋدجەتكە سالىقتاردىڭ تولىق تۇسپەۋىنە، وداق نارىقتارىنا كونترافاكتىلىك، ساپاسىز جانە كەيدە ءقاۋىپسىز ەمەس ونىمدەردى اكەلۋگە نازار اۋداردى.
«بۇل فاكتور ءوزارا ساۋداداعى باسەكەلەستىك نارىقتىڭ دامۋىنا تەرىس اسەر ەتەدى، بۇل، سايىپ كەلگەندە، ەكونوميكانىڭ جەكەلەگەن وسال سالالارىنىڭ دامۋىنا ءقاۋىپ توندىرەدى»، — دەپ تۇيىندەدى ب. سۇلتانوۆ.
قىرعىزستاننان كەلىسسوزدەرگە كەدەن جانە سالىق قىزمەتتەرىنىڭ ءبىرىنشى باسشىلارى قاتىستى. قىرعىز دەلەگاسياسىن مينيسترلەر كابينەتى ءتوراعاسىنىڭ ءبىرىنشى ورىنباسارى ارزىبەك كوجوشيەۆ باسقاردى. رەسەي تاراپىنان قارجى ءمينيسترىنىڭ ورىنباسارى، ستاتس-حاتشى الەكسەي سازانوۆ باستاعان كەدەن جانە سالىق قىزمەتتەرىنىڭ باسشىلىعى قاتىستى.
كەزدەسۋ اياسىندا ساراپشىلار دەڭگەيىندەگى تاراپتاردىڭ وتىرىسى جانە دەلەگاسيا باسشىلارىنىڭ قاتىسۋىمەن كەڭەيتىلگەن قۇرامداعى كەڭەس ءوتتى. كەلىسسوزدەر بارىسىندا تاراپتار قازاقستان مەن رەسەي قارجى مينيسترلىكتەرى دەڭگەيىندەگى ءوزارا ۋاعدالاستىقتاردى ىسكە اسىرۋ بويىنشا قوسىمشا شارالاردى ازىرلەي وتىرىپ، وتكەن جىلعى كەزدەسۋدىڭ قورىتىندىلارىن تالقىلادى.
قازاقستان، قىرعىزستان جانە رەسەي اراسىندا اقپارات الماسۋ ماسەلەلەرى قارالدى. تاراپتار ءوزارا ءىس-قيمىل پروسەسىن ۇيىمداستىرۋ ءۇش ەلدىڭ كولەڭكەلى ەكونوميكاسىمەن كۇرەس جونىندەگى وزەكتى ماسەلەلەردى شەشۋگە مۇمكىندىك بەرەتىنىن اتاپ ءوتتى.
كۇن تارتىبىندەگى تارماقتاردىڭ ءبىرى ءوزارا ساۋدادا وتكىزىلەتىن تاۋارلار بويىنشا تاۋارعا ىلەسپە قۇجاتتاردا قۇندى دۇرىس كورسەتۋ پروبلەماسىن تالقىلاۋ بولدى. تاراپتار تاۋەكەلى جوعارى ەكسپورتتاۋشىلاردىڭ ساناتتارىن ايقىنداي وتىرىپ، وسى ماسەلەنى نەعۇرلىم تەرەڭ پىسىقتاۋ جانە ولارمەن ناقتى جۇمىس ىستەۋ قاجەتتىگىن قولدادى.
سونداي-اق كەلىسسوزدەر بارىسىندا قازاقستان، قىرعىزستان جانە رەسەيدىڭ فيسكالدىق جانە قۇقىق قورعاۋ ورگاندارىنىڭ قاتىسۋىمەن الداعى جىلعا ءۇشجاقتى ءوزارا ءىس-قيمىلدى جولعا قويۋ تۋرالى ۋاعدالاستى.
كەزدەسۋ قورىتىندىسى بويىنشا تاراپتار قول جەتكىزىلگەن ۋاعدالاستىقتاردى ىسكە اسىرۋ كەدەن-سالىق سالاسىنداعى ىنتىماقتاستىقتى نىعايتۋعا وڭ سەرپىن بەرەتىنىن، بۇل جالپى ءبىزدىڭ ەلدەرىمىزدىڭ ەكونوميكاسىنا وڭ اسەر ەتەتىنىن اتاپ ءوتتى.