1992 جىلى 23 ماۋسىمدا قازاقستان رەسپۋبليكاسىنىڭ پرەزيدەنتى “ىشكى ىستەر ورگاندارى تۋرالى” زاڭعا قول قويدى.
بۇل قازاقستان پوليسياسىنىڭ مىندەتتەرى مەن فۋنكسيالارىن، ونىڭ قۇقىقتارىن، ءىىو قىزمەتكەرلەرىنىڭ الەۋمەتتىك كەپىلدىكتەرى مەن قۇقىقتىق قورعالۋىن انىقتاعان العاشقى اكت بولدى. قازاقستان پوليسياسىنىڭ تاريحى سول كەزدەن باستالادى. ىشكى ىستەر مينيسترلىگىنىڭ جاڭا رامىزدەرى مەن ءبىرىڭعاي كيىم ۇلگىلەرى ازىرلەندى.
الماتىدا پوليسەيلەر كاسىبي مەرەكەلەرىنە وراي اقپاراتتىق-يميدجدىك ناۋقان باستادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
تەليەۆيزيالىق “قازاقستان پوليسياسىنىڭ قۇرداستارى”، “مەنىڭ اكەم/انام – پوليسەي”، “وتباسى اۋلەتتەرى”، “ارامىزداعى قاھارماندار” جانە “ۇزدىك پوليسەي” ايدارلارى ارقىلى ازاماتتار ق ر ءىىو-نىڭ قۇرىلۋ تاريحىمەن جانە زامانىمىزدىڭ قاھارماندارىمەن تانىسادى. ال ۇزدىك تەرگەۋشىلەر، كريميناليستەر، جەدەل ۋاكىلدەر، كينولوگتار مەن ۋچاسكەلىك پوليسيا قىزمەتكەرلەرى مەرەكە قارساڭىندا قالانىڭ ەلەكتروندى بوردتارىندا كورسەتىلەدى.
– بۇگىنگى تاڭدا قالامىز ءوزىنىڭ قايتالانباس كەلبەتىن ساقتاپ قانا قويماي، جىل سايىن قارقىندى دامىپ، كوركەيىپ كەلەدى. الماتىلىقتاردىڭ قاۋىپسىزدىگى مەن تىنىشتىعى مەرەكە جانە دەمالىس كۇندەرىنە قاراماستان، كۇنى-تۇنى 6 مىڭنان استام قىزمەتكەر جۇمىس ىستەيتىن ۇلكەن جانە كوپ فۋنكسيالى مەملەكەتتىك ورگان – پوليسيا دەپارتامەنتىنە جۇكتەلگەن. بۇگىنگى تاڭدا الماتى قالالىق پوليسياسىندا قىلمىسقا قارسى كۇرەس جۇرگىزۋگە، قوعامدىق ءتارتىپتى نىعايتۋعا جانە قالاداعى قاۋىپسىزدىكتى قامتاماسىز ەتۋگە بارلىق قاجەتتى جاعدايلار مەن مۇمكىندىكتەر بار، – دەدى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.
مەرەكەلىك ءىس-شارالار ءىىو باسشىلارىنىڭ، پوليسيا ارداگەرلەرىنىڭ، قىزمەتتىك مىندەتتەرىن ورىنداۋ كەزىندە قازا تاپقان پوليسيا قىزمەتكەرلەرىنىڭ تۋىستارىنىڭ، سونداي-اق ءپد-نىڭ قىزمەتتەرى مەن بولىمشەلەرىنىڭ جەكە قۇرامىنىڭ قاتىسۋىمەن وتەتىن مەرەكەلىك كونسەرتپەن اياقتالادى.