“قازاقستان رەسپۋبليكاسىندا ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان كەشەندى جوسپارىنىڭ” 71-تارماعىن ورىنداۋ ماقساتىندا ءىىم كينولوگيالىق ورتالاعىنىڭ بازاسىندا ۇقشۇ-عا مۇشە مەملەكەتتەردىڭ “كانال-پەرەحۆات” اۋقىمدى حالىقارالىق ەسىرتكىگە قارسى وپەراسياسى شەڭبەرىندە ەكى ەلدىڭ كينولوگ-ماماندارىنىڭ بىرلەسكەن وقۋ-جاتتىعۋلارى وتكىزىلدى، دەپ حابارلايدى Almaty-akshamy.kz.
Polisia.kz مالىمەتىنشە، بۇل وپەراسيا ەسىرتكىنىڭ ترانسۇلتتىق زاڭسىز اينالىمىنىڭ الدىن الۋعا، ەسىرتكى كونترابانداسىنىڭ ارنالارىن جابۋ بويىنشا پراكتيكالىق مىندەتتەردى شەشۋگە، ەسىرتكى بيزنەسىنىڭ ەكونوميكالىق نەگىزدەرىنە نۇقسان كەلتىرۋگە، ونىڭ ىشىندە ەسىرتكى تابىستارىن زاڭداستىرۋعا باعىتتالعان.
وقۋ-جاتتىعۋ بارىسىندا كينولوگ-ماماندار وقىتۋدىڭ وزىق تاجىريبەسىن ەنگىزۋ جانە قىزمەتتىك-ىزدەستىرۋ يتتەرىن ۇيرەتۋ، ءتورتاياقتى كومەكشىلەردى ەسىرتكى ىزدەۋدەن باستاپ، قىلمىس ورىندارىندا ساقتالعان يىستەرمەن جۇمىس ىستەۋگە دەيىنگى ءتۇرلى جەدەل مىندەتتەردە پراكتيكالىق قولدانۋ بويىنشا تاجىريبە الماستى. كينولوگيالىق قىزمەتتەردىڭ سينتەتيكالىق ەسىرتكى، گەروين جانە ماريحۋانانى انىقتاۋعا قاتىسۋىنا ەرەكشە نازار اۋدارىلدى.
كينولوگتار مەن قىزمەتتىك يتتەردىڭ پراكتيكالىق ساباقتارى “قازپوشتا” اق بازاسىندا وتكىزىلدى. مۇندا پوشتا جونەلتىلىمدەرىن، ولاردا ەسىرتكى بار-جوعىن زەرتتەۋ تاكتيكاسى پىسىقتالدى. وقۋ-جاتتىعۋعا قاتىسۋشىلار مەن “كانال-پەرەحۆات” ارنايى وپەراسياسىنا قاتىسۋشى مەملەكەتتەردىڭ وكىلدەرى قازاقستاندىق كينولوگتاردىڭ يتتەردى سينتەتيكالىق ەسىرتكىلەردى ىزدەۋگە ۇيرەتۋدەگى جەتىستىكتەرىن اتاپ ءوتتى. بۇل ءبىزدىڭ مامانداردان نەگىزگى زاتتىڭ حيميالىق فورمۋلاسى وزگەرگەن كەزدە دە امبەباپ بولىپ تابىلاتىن جانە وزگەرمەيتىن ەسىرتكىنىڭ ءيىس يميتاتورلارىن ىزدەۋ بويىنشا جەكە ادىستەمەنى ازىرلەۋدى تالاپ ەتتى.
وقۋ-جاتتىعۋ بارىسىندا ەكى مەملەكەتتىڭ كينولوگتارى قارۋلى قىلمىسكەرلەردى قيىن جاعدايدا ۇستاۋ بويىنشا جاتتىقتى. جيىنعا قاتىسۋشىلار ۇقشۇ-عا مۇشە مەملەكەتتەردىڭ قۇقىق قورعاۋ ورگاندارى مەن ارنايى قىزمەتتەرى اراسىنداعى تىكەلەي بايلانىستاردى نىعايتۋعا، ءتيىستى حالىقارالىق ۇيىمدارمەن ىنتىماقتاستىق ورناتۋعا مۇمكىندىك الدى. 2023 جىلى ءىىم كينولوگيالىق ورتالىعىنىڭ قىزمەتتىك يتتەرى سينتەتيكالىق ەسىرتكىلەردى ىزدەۋگە ۇيرەتىلدى. ورتالىقتا ەلىمىزدىڭ ءار ايماعىنان 100-گە جۋىق مامان قىزمەتتىك يتتەرىمەن بىرگە وقىتۋدان ءوتتى. پوليسيادا جۇمىس ىستەۋ ءۇشىن 27 كۇشىك ءوسىرىلدى.