«المالى» كىتاپحاناسىندا قازاقستان حالقى تىلدەرى كۇنىنە وراي الماتى قالاسى مەكتەپتەرىندەگى وزگە ۇلت وقۋشىلارى اراسىندا «قازاق ءتىلى – قازىعىم» بايقاۋى ۇيىمداستىرىلدى. بايقاۋعا قازاق ءتىلىن ەركىن مەڭگەرگەن وزگە ۇلت وكىلدەرىنىڭ 8-10 سىنىپ ارالىعىنداعى مەكتەپ وقۋشىلارى قاتىستى. 
- بۇگىن قازاقستان حالقى تىلدەرى كۇنىنە وراي الماتى قالاسى قوعامدىق دامۋ باسقارماسىنىڭ «قوعامدىق كەلىسىم» مەكەمەسى «قازاق ءتىلى – قازىعىم» اتتى بايقاۋ ۇيىمداستىرىپ وتىر. بايقاۋدىڭ ماقساتى – قازاقستاندىق ەتنوستاردىڭ مەملەكەتتىك ءتىلدى مەڭگەرگەن جاس وكىلدەرىن انىقتاۋ، قولداۋ جانە ىنتالاندىرۋ، مەملەكەتتىك ءتىلدى ناسيحاتتاۋ. ءىس-شاراعا الماتى ءار اۋدانىنان كەلگەن 20-عا جۋىق وقۋشى قاتىسىپ جاتىر، – دەدى ءادىلقازىلار القاسىنىڭ مۇشەسى بالنۇر اسقار قىزى.
سونداي-اق ول قازاق تىلىنە ارنالعان بايقاۋدىڭ ءۇش كەزەڭنەن تۇراتىنىن اتاپ ءوتتى.
- ءبىرىنشى كەزەڭدە وقۋشىلار قازاق تىلىندە وزدەرىن شىعارماشىلىق جاعىنان تانىستىرادى. «ونەر الدى قىزىل ءتىل» دەگەن ەكىنشى كەزەڭدە قاتىسۋشىلار قازاق اقىن-جازۋشىلارىنىڭ تۋىندىسىن جاتقا ايتىپ بەرەدى. ءۇشىنشى كەزەڭدە بەرىلگەن ماقال-ماتەلدەردى تولىقتىرىپ جازۋ كەرەك. جالپى بايقاۋ ناتيجەسى بويىنشا ءۇش 3-ورىن، ەكى 2-ورىن، ءبىر 1-ورىن العان قاتىسۋشىلار باعالى سىيلىقتارمەن ماراپاتتالادى، – دەدى بالنۇر اسقار قىزى.
«قازاق ءتىلى – قازىعىم» بايقاۋىنا قاتىسقان سامۋەل مەملەكەتتىك ءتىلدى ءۇش جىلدان بەرى ۇيرەنىپ جۇرگەنىن ايتتى.
- مەنىڭ جاسىم 13-تە. مەن قازاق جەرىندە تۋىلعام. ءبىراق قازاق ءتىلىن ۇيرەنىپ جۇرگەنىمە 3 جىل بولدى. قازىرگى دەيىن ءتىلدى ءبىراز ۇيرەنىپ قالدىم. بۇگىن اباي قۇنانباي ۇلىنىڭ شىعارماشىلىعىن وقىپ، دايىندالىپ كەلدىم، – دەدى سامۋەل ۋسوروح.