الماتىدا قازاق كينوسىنىڭ وكىلدەرى تال ەكتى

Iس-شاراعا 80 ءتۇپ كوشەت اكەلدى.

بۇگىن قازاق كينوسىنىڭ وكىلدەرى «قازاقفيلم» كينوستۋدياسىنىڭ اۋماعىندا تال ەگىپ، اكسيا وتكىزدى. ءىس-شاراعا وتاندىق ءفيلمنىڭ ارداگەرى ءاسانالى ءاشىموۆ باستاعان مايتالماندار مەن اتالعان سالانىڭ جاس ماماندارى قاتىستى، دەپ حابارلايدى Almaty-akshamy.kz Almaty.tv سىلتەمە جاساپ.

ءوز زامانىندا شاكەن ايمانوۆ باستاعان بۇل ءىستى جالعاستىرۋ – ءارقايسىمىزدىڭ ادامي بورىشىمىز  دەيدى جينالعاندار.
«اعاش ەككەنىمىز جالپى ۇلكەن ساۋاپ قوي. ەرتەڭ جەمىس اعاشى بولسا، ونىڭ ءاربىر جەمىسىن جەگەن سايىن، ەككەن ادامعا ساۋاپ جازىلادى. ال كولەڭكەسىندە اپتىعىن باسىپ، دەمالادى»، – دەدى ق ر ەڭبەك سىڭىرگەن قايراتكەرى، اكتەر ءادىل احمەتوۆ.

«بۇل –  وتە ءبىر ۇلاعاتتى ءىس. كەيىنگى ۇرپاق ۇلگى الادى. سوندىقتان، سول ونەرپازداردى باعالاپ جاتقان كينوستۋديانىڭ باسشىسى اقان ساتايەۆتان باستاپ، بارلىق ۇيىمداستىرۋشىلارعا العىس بىلدىرەمىن. ەلىمىز امان بولسىن، زامان تىنىش بولسىن»، – دەدى ق ر ەڭبەك سىڭىرگەن قايراتكەرى، اكتەر بولات ءابدىلمانوۆ.
اكسيانى وتكىزۋگە «قازاقفيلم» كينوستۋدياسىنىڭ باسشىلىعىمەن قاتار  جاستار ۇيىمى نيەت بىلدىرگەن. ولار بۇگىنگى ءىس-شاراعا 80 ءتۇپ كوشەت اكەلدى. ىزگى ىسكە اتسالىسۋدى ابىروي ساناعان جاستار مۇنداي اكسيا ءالى دە جالعاسادى دەپ سەنەدى.

«10 ۇيەڭكى، 10 ەمەن، 10 سيرەن، 10 پاۆلونيا جانە 30 الما اعاشىن اكەلدىك. قازاقتا جاقسى ءسوز بار عوي: «1 جىلدىعىن ويلاعان حالىق بيداي ەگەدى، 100 جىلدىعىن ويلاعان حالىق اعاش وتىرعىزادى، ال 1000 جىلدىعىن ويلاعان حالىق ءبىلىمدى ۇرپاق تاربيەلەيدى»،– دەدى   «Bugin Association» قوعامدىق بىرلەستىگىنىڭ ءتوراعاسى الىبەك قىزايباي.