الماتىدا 9 مامىر قارساڭىندا قالانىڭ ءار اۋدانىندا كونسەرتتىك باعدارلامالار، مەموريالدارعا گۇل شوقتارىن قويۋ، اسكەري تەحنيكا كورمەلەرى جانە اسكەري-دالا اسحاناسى وتەدى.
ءىس-شارانىڭ قۇرمەتتى قوناقتارى ۇلى وتان سوعىسىنىڭ ارداگەرلەرى بولادى، ولار جەڭىس كۇنىنە دەيىن 1 ملن تەڭگە كولەمىندە ءبىرجولعى تولەم الادى، دەپ حابارلايدى Almaty-akshamy.kz
مەرەكەلەۋ اياسىندا ۇلى وتان سوعىسىنا قاتىسۋشىلاردىڭ پورترەتتەرى بار بيلبوردتاردى ورنالاستىرۋ، قالانى مەرەكەلىك بەزەندىرۋ جوسپارلانۋدا.
مەرەكە كۇندەرى قالا اكىمدىگى 50 مىڭ «جەڭىس لەنتاسىن» تاراتۋدى ۇيىمداستىرادى. ولاردى 28 گۆاردياشىل-پانفيلوۆشىلار اتىنداعى ساياباقتا، ورتالىق مادەنيەت جانە دەمالىس ساياباعىندا جانە ءىس-شارالار وتەتىن باسقا دا ورىنداردا الۋعا بولادى.
ارداگەرلەردى قۇتتىقتاۋعا قالانىڭ ەتنومادەني بىرلەستىكتەرى قاتىسادى، ولار ءوز تاراپىنان ماتەريالدىق كومەك، ازىق-تۇلىك سەبەتتەرىن، دارى-دارمەكتەر مەن ءبىرىنشى كەزەكتە قاجەتتى زاتتاردى دايىندادى.
5-8 مامىر ارالىعىندا ارداگەرلەر تۇراتىن قالانىڭ تۇرعىن ءۇي كۆارتالدارىندا، شاعىن اۋداندارىندا اسكەري وركەستردىڭ قاتىسۋىمەن كونسەرتتەر وتەدى. قالا اكىمى، ونىڭ ورىنباسارلارى، اۋدان اكىمدەرى، ءماسليحات دەپۋتاتتارى ارداگەرلەرگە بارىپ، ولاردى مەرەكەمەن قۇتتىقتايدى دەپ جوسپارلانۋدا.
مەرەكە كۇنى 9 مامىر كۇنى ساعات 9.30-دا 28 گۆاردياشىل-پانفيلوۆشىلار اتىنداعى ساياباقتا ماڭگىلىك الاۋعا گۇل شوقتارىن قويۋ ءراسىمى وتەدى. وندا زاماناۋي قازاقستاندىق اسكەري تەحنيكا مەن قارۋ-جاراق كورمەسى ۇيىمداستىرىلادى. ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە اسكەري-دالالىق اسحانامەن مەرەكەلىك تۇسكى اس بەرۋ جوسپارلانعان. ساياباقتا مەرەكەلىك كونسەرت وتەدى.
9 مامىر كۇنى ساعات 9.30-دا «باتىرلارعا تاعزىم» اكسياسى ۇيىمداستىرىلادى، ونىڭ اياسىندا قالا تۇرعىندارى م. گوركيي اتىنداعى ورتالىق مادەنيەت جانە دەمالىس ساياباعىنان گوگول كوشەسى بويىمەن 28 گۆاردياشىل-پانفيلوۆشىلار پاركىنە دەيىن ءجۇرىپ ءوتىپ، سوعىستا قازا تاپقانداردى ەسكە الۋ ءۇشىن گۇلشوقتارىن قوياتىن بولادى.
قالا ورتالىعىندا عانا ەمەس، باسقا اۋدانداردا دا مەرەكەلىك شارالار وتەدى: 6 مامىر كۇنى ساعات 11.00-دە الاتاۋ اۋدانى اكىمدىگى عيماراتىنىڭ الدىنداعى الاڭدا اۋدان ارداگەرلەرى مەن جاستاردىڭ قاتىسۋىمەن «ەر ەسىمى - ەل ەسىندە» ەسكەرتكىشىنە گۇل شوقتارىن قويۋ ءراسىمى وتەدى.
7 مامىردا ساعات 12.00-دە «باقشاساراي» زالىندا بوستاندىق اۋدانىنىڭ اكىمدىگى مەرەكەگە ارنالعان سالتاناتتى ءىس-شارا ۇيىمداستىرادى.
8 مامىر كۇنى ساعات 11.00-دە «گۇلدەر» ساياباعىندا جەتىسۋ اۋدانى اكىمدىگى دايىنداعان كونسەرت وتەدى.
9 مامىر كۇنى ساعات 10.00-دە ناۋرىزباي اۋدانى اكىمدىگى عيماراتىنىڭ الدىندا «ەرلىكتىڭ ءىزى وشپەيدى» اتتى مەرەكەلىك كونسەرت ۇيىمداستىرىلادى.
9 مامىردا ساعات 11.00-دە ءا. مولداعۇلوۆا مەن م. مامەتوۆا اتىنداعى سكۆەردە المالى اۋدانىنىڭ اكىمدىگىنىڭ 9 مامىر – جەڭىس كۇنىنە ارنالعان كونسەرتى وتەدى.
ءدال وسى ۋاقىتتا 9 مامىردا Family Park دەمالىس ساياباعىندا جەڭىستىڭ 77 جىلدىعىنا ارنالعان تاعى ءبىر كونسەرت بولادى.
9 مامىر كۇنى ساعات 11.00-دە س. سەيفۋللين اتىنداعى ساياباقتا تۇركسىب اۋدانىنىڭ تۇرعىندارى ءۇشىن كونسەرت ۇسىنىلادى.
9 مامىر كۇنى ساعات 14.00-دە مەدەۋ اۋدانىنىڭ اپپاراتى 28 گۆاردياشى-پانفيلوۆشىلار اتىنداعى ساياباقتا كونسەرت ۇيىمداستىرادى.