وتكەن سەنبى كۇنى الماتىدا قازاقستاننىڭ سيفرلاندىرۋ كۇنىنە ارنالعان Qazaq IT Community Day فورۋمى ۇيىمداستىرىلدى. ءىس-شاراعا 300-دەن استام IT سالاسىنىڭ وكىلدەرى، ونىڭ ىشىندە تالانتتى قازاقستاندىق جاستار قاتىستى. فورۋم قازاقستان رەسپۋبليكاسى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى، الماتى قالاسى اكىمدىگى، جاساندى ينتەللەكت قاۋىمداستىعى، Women in Tech Kazakhstan، GDG جانە Women Techmakers ۇيىمدارىنىڭ قولداۋىمەن ءوتتى، دەپ حابارلايدى aqshamnews.kz قازاقستاننىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە سىلتەمە جاساپ.
فورۋمدا جاستار ساياساتى مەن سيفرلاندىرۋعا قاتىستى نەگىزگى تاقىرىپتار تالقىلاندى، سەبەبى يننوۆاسيا مەن ادامي كاپيتال قازاقستاننىڭ سيفرلىق الەۋەتىن ايقىندايدى.
فورۋمدا ايتىلعان باستى ماسەلەلەر: جاساندى ينتەللەكت ماماندارىن دايارلاۋ:
«2029 جىلعا قاراي 1 ميلليون AI تالانتىن دايىنداۋىمىز كەرەك. بۇل AI مادەنيەتىن قالىپتاستىرۋ جانە ينفراقۇرىلىمدى دامىتۋ ارقىلى جۇزەگە اسادى»، — دەدى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترىنىڭ ءبىرىنشى ورىنباسارى قانىش تۋلەۋشين.
جاساندى ينتەللەكتتى رەتتەۋ:
«ەگەر ءبىز ءقازىر جاساندى ينتەللەكتتى رەتتەۋمەن اينالىسپاساق، كەيىن ونىمەن كەلىسىمگە كەلۋگە ءماجبۇر بولامىز»، — دەپ اتاپ ءوتتى ق ر ءماجىلىس دەپۋتاتى ەكاتەرينا سمىشليايەۆا.
- قالانىڭ قاۋىپسىزدىگى:
الماتى قالاسىندا جەر سىلكىنىسى كەزىندە جەدەل حابار بەرۋ ءۇشىن سيفرلىق شەشىمدەر ەنگىزىلۋدە.
«بۇل الماتى ءۇشىن وتە ماڭىزدى»، — دەپ مالىمدەدى الماتى قالاسى سيفرلاندىرۋ باسقارماسىنىڭ باسشىسى ولجاس جانابەك.
- تەحنولوگيالىق كاسىپكەرلىك:
ۆەنچۋرلىق ينۆەستور باحت نيازوۆ تەحنولوگيالىق كاسىپكەرلىكتىڭ ماڭىزدىلىعى تۋرالى بايانداما جاسادى.
«مۇنداي پلاتفورمالار جاستار ءۇشىن ۇلكەن مۇمكىندىك بەرەدى. ەگەر بۇگىن قاتىسۋشىلاردىڭ اراسىنان كەم دەگەندە ەكى ستارتاپ دۇنيەگە كەلسە، بۇل ۇلكەن جەتىستىك بولماق»، — دەدى ول.
وڭىرلىك ۋنيۆەرسيتەتتەردىڭ ءرولى:
قورقىت اتا اتىنداعى قىزىلوردا ۋنيۆەرسيتەتىنىڭ وكىلى ماحمۇت تومانوۆ جاساندى ينتەللەكت ينفراقۇرىلىمىن دامىتۋداعى وڭىرلىك جوعارى وقۋ ورىندارىنىڭ ءرولىن اتاپ ءوتتى.
- جاساندى ينتەللەكتتى دامىتۋ:
جاساندى ينتەللەكت قاۋىمداستىعىنىڭ وكىلدەرى قازاقستاندا يي دامىتۋ بويىنشا جوبالار، تاسىلدەر جانە ماسەلەلەر تۋرالى بايانداما جاسادى. قاۋىمداستىقتىڭ قۇرىلعانى مەملەكەتتىڭ بيزنەس-پەن ءتيىمدى ديالوگىن قامتاماسىز ەتۋگە باعىتتالعان. بۇل تۋرالى قاۋىمداستىق ءتوراعاسىنىڭ ورىنباسارى انار تولەۋبايەۆا ايتتى.
- كيبەرقاۋىپسىزدىك:
كيبەرقاۋىپسىزدىك جانە الەۋمەتتىك ينجەنەرياعا قارسى تۇرۋ سەسسياسىندا گتس رك باسقارما ءتوراعاسى اسقار جۇنىسبەك، ساركا، QazTech، BAKOTECH، MSSP Global جانە باسقا دا كومپانيالاردىڭ ساراپشىلارى الەۋمەتتىك جەلىلەردە ءوزىن-وزى ۇستاۋدىڭ نەگىزگى ەرەجەلەرى مەن ينتەرنەتتەگى قاۋىپسىزدىكتى قامتاماسىز ەتۋ قۇرالدارىن تالقىلادى.
«كەز كەلگەن كۇماندى جاعدايدا ەڭ الدىمەن اقىل مەن لوگيكاعا سۇيەنۋ كەرەك»، — دەپ اتاپ ءوتتى ساراپشىلار.
بيىل Qazaq IT Community ۇزدىك IT جوبالار مەن ولاردىڭ اۆتورلارىن جەتى نوميناسيا بويىنشا ماراپاتتادى: Rising Star in IT 2024، Innovation Driver 2024، Social Impact in IT 2024، Tech Advancement of the Year 2024، Mobile App Innovator 2024، Strategic Team Leader، Web Mastermind 2024.
جەڭىمپازدارعا Cloupard كومپانياسى ۇسىنعان 350 مىڭ تەڭگەلىك گرانتتار تابىستالدى. تولىعىراق اقپاراتتى @qazaqitcom Instagram پاراقشاسىنان وقي الاسىز. بايقاۋعا بارلىعى 85 ءوتىنىم كەلىپ تۇسكەن، ولاردىڭ ىشىنەن ۇزدىكتەر تاڭداپ الىندى. قازىلار القاسىندا او «قازپوشتا»، او «بانك سەنتركرەديت»، او «قازاقتەلەكوم»، Axiom Capital، Women in Tech Kazakhstan جانە باسقا دا ۇيىمداردىڭ وكىلدەرى بولدى.
Qazaq IT Community — قازاقستانداعى ەڭ ءىرى IT قاۋىمداستىق، ونىڭ قۇرامىنا 4 300-دەن استام IT مامانى كىرەدى. قاۋىمداستىق قاتىسۋشىلار ءۇشىن تەگىن ءىس-شارالار ۇيىمداستىرادى، ولاردىڭ قاتارىندا تەحنيكالىق جانە تاقىرىپتىق ميتاپتار، تاۋ ساياحاتتارى جانە باسقا دا شارالار بار.