الماتىدا «قازاق بالالار ادەبيەتىنىڭ تاريحى» اتتى ەكى تومدىق مونوگرافيانىڭ تانىستىرىلىمى ءوتتى

عالىمعا پرەزيدەنتتىڭ العىس حاتى تابىستالدى

بۇگىن الماتىداعى ۇلتتىق كىتاپحاناسىندا م.و. اۋەزوۆ اتىنداعى ادەبيەت جانە ونەر ينستيتۋتىنىڭ قولداۋىمەن جازۋشى، عالىم نۇرداۋلەت اقىشتىڭ «قازاق بالالار ادەبيەتىنىڭ تاريحى» اتتى ەكى تومدىق مونوگرافياسىنىڭ تۇساۋكەسەر ءراسىمى ءوتتى، دەپ حابارلايدى Almaty-akshamy.kz.

شارانى م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ماتىجانوۆ كەنجەحان ءىسلامجان ۇلى جۇرگىزدى.

ءىس-شاراعا قازاقستان رەسپۋبليكاسى پرەزيدەنتىنىڭ كەڭەسشىسى، جازۋشى وتاربايەۆ مالىك نۇرجان ۇلى  ارنايى كەلىپ، قازاق ادەبيەتىنىڭ جانە قازاق بالالار ادەبيەتىنىڭ دامۋىنا قوسقان ەلەۋلى ەڭبەگى ءۇشىن جازۋشى نۇرداۋلەت اقىشقا مەملەكەت باسشىسى ق.ك. توقايەۆتىڭ العىس حاتىن تابىستادى.

شارادا قازاقستان جازۋشىلار وداعى باسقارماسى ءتوراعاسىنىڭ ءبىرىنشى ورىنباسارى، اقىن نۇرجان قۋانتاي ۇلى، فيلولوگيا عىلىمدارىنىڭ دوكتورى، ادەبيەت سىنشىسى بەكەن ىبىرايىم، فيلولوگيا عىلىمدارىنىڭ دوكتورى، پروفەسسور قانسەيىت ابدەز ۇلى، فيلولوگيا عىلىمدارىنىڭ دوكتورى، جازۋشى، دراماتۋرگ سەرىك اسىلبەك ۇلى، جازۋشى قۋاندىق تۇمەنباي، حالىقارالىق «الاش» ادەبي سىيلىعىنىڭ لاۋرەتى، جازۋشى ءادىلعازى قايىربەكوۆ، جۋرناليست بەيسەنباي سۇلەيمەنوۆ جانە ت.ب. زيالى قاۋىم وكىلدەرى مەن اقىن-جازۋشىلار ءسوز سويلەدى.

سونداي-اق، فيلولوگيا عىلىمدارىنىڭ دوكتورى، پروفەسسور، قازاق ۇلتتىق قىزدار پەداگوگيكالىق ۋنيۆەرسيتەتى، قازاق ادەبيەتى كافەدراسىنىڭ اعا  وقىتۋشىسى بالتابايەۆا گاۋحار ساياديل قىزى ءسوز سويلەپ، قازۇقپۋ رەكتورىنىڭ العىس حاتىن تابىستادى جانە قازۇقپۋ فيلولوگيا فاكۋلتەتىنىڭ 1 كۋرس ستۋدەنتى ايمان سمانقۇل ارناۋ وقىدى.