1995 جىلعى 7 ءساۋىر – تاجىك-اۋعان شەكاراسىندا قازاقستان رەسپۋبليكاسى ىشكى ىستەر مينيسترلىگى ىشكى اسكەرىنىڭ 17 جاۋىنگەرى ەرلىكپەن قازا تاپقان تاريحي كۇن. بيىل وسى قايعىلى ءارى قاھارماندىق وقيعاعا 30 جىل تولىپ وتىر، دەپ حابارلايدى aqshamnews.kz.
الماتى قالاسىنداعى 3650 اسكەري ءبولىمىنىڭ اۋماعىندا تاجىك-اۋعان شەكاراسىندا قىزمەت بابىندا قازا تاپقان ساربازدارعا ارنالعان ەسكەرتكىش تاقتا اشىلدى. ءىس-شاراعا ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ جانە 3650 اسكەري ءبولىمىنىڭ باسشىلىعى، سول ءبىر تاريحي ميسسياعا قاتىسقان ارداگەرلەر، جەرگىلىكتى اتقارۋشى بيلىك وكىلدەرى، وقۋشىلار مەن اسكەير ءبولىمنىڭ جەكە قۇرامى قاتىستى.
شارا بارىسىندا قاتىسۋشىلار ەسكەرتكىش الدىنا گۇل شوقتارىن قويىپ، ءبىر مينۋت ۇنسىزدىكپەن بوزداقتاردىڭ رۋحىنا تاعزىم ەتتى. اسكەري وركەستردىڭ ورىنداۋىندا مەملەكەتتىك گيمن شىرقالدى. جينالعان قاۋىم الدىندا قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆتىڭ اتىنان ارداگەرلەرگە العىس ءسوز وقىلىپ، ەرلىك پەن ەلدىك تۋرالى ەستەلىكتەر ايتىلدى.
– ءبىزدىڭ بۋىننىڭ ءوز ميسسياسى بولدى. ءبىز انتىمىزعا ادال بولدىق. جاۋىنگەرلىك تاپسىرمالاردى ورىنداۋ كەزىندە قارۋلاس جولداستارىمىز كوز جۇمدى. ولاردىڭ ەرلىگى ەشقاشان ۇمىتىلماۋى ءتيىس، – دەدى قاندى شايقاستىڭ كۋاگەرى جانات نەسىپوۆ سول كۇندەردى ەسكە الىپ.