اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە اباي قۇناباي ۇلىنىڭ 180 جىلدىق مەرەيتويى اياسىندا ءداستۇرلى عىلىم اپتالىعىنىڭ اشىلۋ سالتاناتى ءوتتى.
مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ IV وتىرىسىندا: «ءبىز عىلىمدى دامىتۋدا، سونىڭ ىشىندە قولدانبالى زەرتتەۋلەر جۇرگىزۋ ءۇشىن كوپ جۇمىس ىستەپ جاتىرمىز. عىلىمي جاڭالىقتاردى كوممەرسيالاندىرۋعا، عىلىم مەن ءوندىرىستىڭ بايلانىسىن كۇشەيتۋگە باسا ءمان بەرىلىپ وتىر»، - دەپ اتاپ وتكەندەي، بۇگىندە الەمنىڭ الدىڭعى قاتارلى ەلدەرى عىلىم سالاسىنىڭ دامۋىنا باسىمدىقتار بەرىپ وتىر. ال ق ر عىلىم جانە جوعارى ءبىلىم مينيسترلىگىنىڭ ەلىمىزدەگى جەتەكشى جوعارى وقۋ ورىندارىن اۆتونومدى باعىتقا بۇرۋى جانە وقۋ ورىندارى جانىنان عىلىمي-زەرتتەۋ ورتالىقتارىنىڭ قۇرىلۋى عىلىمدى دامىتۋدا نەگىزگى كۇشكە اينالدى.
اتالعان باعىتتا ۇيىمداستىرىلعان ءىس-شاراعا ۋنيۆەرسيتەت باسشىلىعى، فاكۋلتەت دەكاندارى، پروفەسسورلىق-وقىتۋشىلار قۇرامى جانە جاس زەرتتەۋشىلەر كەڭەسى مەن عىلىمي قىزمەتكەرلەر، بەلسەندى ستۋدەنت جاستار قاتىستى.
شارانىڭ اشىلۋ سالتاناتىندا العى ءسوز سويلەگەن ۋنيۆەرسيتەت باسقارما توراعاسى-رەكتور بولات تىلەپ اپتالىقتىڭ اشىلۋى ۇلى اقىن، اعارتۋشى، ويشىل اباي قۇنانباي ۇلىنىڭ 180 جىلدىق مەرەيتويىمەن تۇسپا-تۇس كەلىپ وتىرعاندىعىن ايتا كەلە، اباي شىعارمالارىنىڭ باستى يدەولوگيالىق قازىعى – «قالىڭ ەلى، قايران جۇرتى قازاعىنىڭ» بويىنداعى كەمشىلىكتەردى جويىپ، ءعىلىم-بىلىمدى مەڭگەرگەن، «اقىل، قايرات، جۇرەكتى» بىردەي ۇستانعان، «بەس نارسەدەن قاشىق، بەس نارسەگە اسىق» بولعان، بەرەكە-بىرلىگى جاراسقان، ءوي-ورىسى دامىعان حالقىنىڭ بولاشاعى، تالىم-تاربيەسى، ءعىلىم-بىلىمى ەكەندىگىن اتاپ ءوتتى.
- «ەلىمىزدەگى جوعارى وقۋ ورىندارىنىڭ الدىندا ۇلكەن مىندەت تۇر - ۋنيۆەرسيتەتتىك عىلىمدى دامىتۋ. ارينە، عىلىم ءبىر كۇندىك، ءبىر ايلىق، ءبىر اپتالىق، ءبىر جىلدىق ماسەلە ەمەس. ول ۋنيۆەرسيتەتىمىزدىڭ كۇندەلىكتى جۇمىسىنداعى - ۇلكەن الەۋەت. ۋنيۆەرسيتەتىمىز بۇگىندە عىلىم كەڭىستىگىندە وزىندىك ورنىن ناقتىلادى. ءبىلىم جانە عىلىم سالاسىندا ءبىرقاتار جەتىستىكتەرگە قول جەتكىزىپ، بيىك بەلەستەردى باعىندىرۋدا. ءداستۇرلى تۇردە ۇيىمداستىرىلاتىن عىلىم اپتالىعىنىڭ ءار جىلدا ءبىر وزىندىك ەرەكشەلىگى بار. بيىلعى اپتالىقتىڭ اشىلۋى ۇلى اقىن، اعارتۋشى، ويشىل اباي قۇنانباي ۇلىنىڭ 180 جىلدىق مەرەيتويىمەن تۇسپا-تۇس كەلىپ وتىر. سوندىقتان عىلىم اپتالىعىن ۇلى ابايدىڭ 180 جىلدىعىنا ارنايى ارناپ وتىرمىز. ودان بولەك، ۋنيۆەرسيتەتىمىزدە سوڭعى ءبىر جىلدا جاساقتالعان عىلىمي-يننوۆاسيالىق پارك اشىلعالى وتىر. بۇل پاركتىڭ اياسىندا بىرنەشە جاڭا زەرتحانالار جۇمىسىن باستايتىن بولادى. مۇندا بولاشاق پەداگوگتەر مەن زەرتتەۋشىلەر سيفرلىق وقىتۋ ادىستەرىن مەڭگەرىپ، يننوۆاسيالىق جوبالارمەن اينالىسا الادى. 100 جىلدىق تاريحى بار ۋنيۆەرسيتەتىمىزدىڭ عىلىمي پوتەنسيالى، الەۋەتى وتە جوعارى. ءبىزدىڭ قازىرگى مىندەتىمىز ءارى ماقساتىمىز وسى پوتەنسيالدىڭ ساباقتاستىعىن ساقتاي وتىرىپ، ودان ءارى دامىتۋ. بۇل ارينە، ەڭ ءبىرىنشى كەزەكتە جاس عالىمداردى قولداۋ ماسەلەسىنە تىكەلەي تاۋەلدى. سوندىقتان دا، بيىلعى عىلىم اپتالىعىندا ءبىلىم الۋشىلاردىڭ عىلىمداعى تالپىنىستارىنا قولداۋ كورسەتۋ، ولاردى عىلىمي ىزدەنىستەرگە قىزىقتىرۋ ماقساتىندا اپتالىق اياسىندا 120-عا جۋىق ۇلكەندى-كىشىلى ءىس-شارا جوسپارلاندى. بۇل شارالاردىڭ ءارقايسىسى بىزگە وتە ماڭىزدى. ونىڭ ىشىندە حالىقارالىق عىلىمي-پراكتيكالىق كونفەرەنسيالار، جاس عالىمدار اراسىنداعى بايقاۋلار، سەمينارلار مەن ترەنينگتەر، شەتەلدىك ساراپشىلاردىڭ دارىستەر سەرياسى، Ted فورماتىنداعى كەزدەسۋلەر بار. وسى تۇستا اباي ۋنيۆەرسيتەتىنىڭ جانىنان اشىلعان «Abai Labs» عىلىمي-يننوۆاسيالىق پاركىنە قاراستى لابوراتوريالاردىڭ دا قارقىندى جۇمىس ىستەپ جاتقاندىعىن ايتىپ وتۋگە بولادى. بۇگىن وسى سالتاناتتى شارانىڭ جالعاسى رەتىندە «Abai Labs» عىلىمي- يننوۆاسيالىق پاركىنەن جاڭا زەرتحانانىڭ اشىلۋ سالتاناتى وتەدى»، - دەدى رەكتور.
ءىس-شارا بارىسىندا «Abai Labs» عىلىمي-يننوۆاسيالىق پاركىنە قاراستى «ءبىلىم بەرۋدەگى VR/AR تەحنولوگيالارى» عىلىمي زەرتحانانىڭ اشىلۋ ءراسىمى ءوتتى. بۇل زاماناۋي ءبىلىم بەرۋ تەحنولوگيالارىن دامىتۋعا باعىتتالعان ماڭىزدى قادام. زەرتحانا جاڭا بۋىندى ۆيرتۋالدى جانە تولىقتىرىلعان شىنايىلىق تەحنولوگيالارىن ءبىلىم بەرۋ ۇدەرىسىنە ەنگىزۋگە ارنالعان.
ودان بولەك، ق ر ۇعا اكادەميگى مامبەت قويگەلدييەۆتىڭ عىلىمي جەتەكشىلىگىمەن دايارلانعان 12 تومدىق «الاشوردا ءىسى. 1920 - 1940 جج. قۇجاتتار مەن ماتەريالدار» جيناعىنىڭ تۇساۋ كەسەرى، اباي قۇنانباي ۇلىنىڭ 180 جىلدىعىنا وراي «اباي مۇراسى - رۋحانيات قازىناسى» عىلىمي سەمينارى، Abaı Innovation Fest: يننوۆاسيالىق جوبالار مەن ستارتاپتار كورمەسى جانە تاعى باسقا عىلىمي، ادىستەمەلىك سەمينارلار مەن دارىستەر ءوتتى.
ايتا كەتەيىك، وقۋ ورنىنىڭ عىلىمي الەۋەتىن دامىتۋ ماقساتىنداعى ءىس-شارالار لەگى 14 ساۋىرگە دەيىن جالعاسىپ، اپتالىق اياسىندا 120-عا جۋىق ءىس-شارا ۇيىمداستىرىلادى. ولاردىڭ قاتارىندا شەتەلدىك جانە وتاندىق جوعارى وقۋ ورىندارى عالىمدارى مەن ىزدەنۋشىلەرىنىڭ قاتىسۋىمەن ءتۇرلى باعىتتاعى جيىندار، حالىقارالىق عىلىمي-پراكتيكالىق كونفەرەنسيالار، جاس عالىمدار اراسىنداعى بايقاۋلار، سەمينارلار مەن ترەنينگتەر، شەتەلدىك ساراپشىلاردىڭ دارىستەر سەرياسى، Ted فورماتىنداعى كەزدەسۋلەر بار.
باسپا ءسوز قىزمەتى