ماماندار قالا تۇرعىندارىنا اۋا رايىنا بايلانىستى كەڭەس بەردى.
اۋا رايىن زەرتتەۋشىلەردىڭ بولجامى بويىنشا، الداعى كۇندەرى ەكى تاۋلىك بويى الماتىدا قالىڭ قار جاۋىپ، اۋا تەمپەراتۋراسى تۇندە 18، كۇندىز 15 گرادۋسقا دەيىن تومەندەپ، اياز بولادى دەپ كۇتىلۋدە. سينوپتيكتەر ودان كەيىنگى كۇندەرى 25 گرادۋسقا دەيىنگى قاتتى اياز بولاتىنىن ەسكەرتىپ جاتىر.
وسىعان وراي كەشە الەۋمەتتىك قىزمەتتەر ۇيىندە الماتى قالاسى كوممۋنالدىق ينفراقۇرىلىمدى دامىتۋ باسقارماسىنىڭ ماماندارى جۋرناليستەرگە ارناپ سۇحبات بەردى. وندا الداعى كۇندەردەگى كۇن رايىنىڭ سۋىتۋىنا بايلانىستى قالادا اتقارىلاتىن جۇمىستار تۋرالى ايتىلدى.
الماتى قالاسى كوممۋنالدىق ينفراقۇرىلىمدى دامىتۋ باسقارماسى كورىكتەندىرۋ ءبولىمىنىڭ باسشىسى ايدىن قالابايەۆتىڭ ايتۋىنشا، بۇگىندە قالانىڭ كوممۋنالدىق قىزمەتتەرى كۇشەيتىلگەن رەجيمدە جۇمىس جاساپ، وندىرىستىك بازالاردا تاۋلىك بويى كەزەكشىلىكتەر ۇيىمداستىرىلۋدا. وتكەن جىلى قىستا قالا بويىنشا 45 مىڭ تەكشە مەتر قار شىعارىلعان. ال بيىل 1 قاڭتاردان باستاپ بۇگىنگى كۇنگە دەيىن 62 مىڭ تەكشە مەتر قار قالا سىرتىنا جونەلتىلدى. سالا ماماندارى كۇن سۋىتقان كەزدە الماتىلىقتارعا مەيلىنشە جىلى كيىنىپ جۇرۋىنە، ال اۆتوكولىك تىزگىندەگەندەرگە جىلدامدىقتى بارىنشا ازايتىپ، اسقان ساقتىقپەن كولىك جۇرگىزۋگە كەڭەس بەردى. سونىمەن قاتار، قالانى قاردان تازالاۋ كەزىندە جول جۇمىسشىلارىنىڭ ەڭبەگىنە قۇرمەتپەن قاراپ، ولاردىڭ جۇمىسىنا كەدەرگى كەلتىرمەۋلەرىن سۇرادى.
– الداعى كۇندەرى قالادا ەكى كۇن بويى قالىڭ قار جاۋىپ، اۋا رايى كۇرت سۋىتادى دەپ كۇتىلۋدە. وسىعان وراي قالا جولدارىندا جۇرگىزۋشىلەرگە جىلدامدىقتى ازايتىپ، كولىك اراسىنداعى اراقاشىقتىقتى ۇلعايتۋعا كەڭەس بەرەمىز. ال جاياۋ جۇرگىنشىلەردى تروتۋارلارمەن جۇرگەندە اباي بولۋلارىن سۇرايمىز. جۇمىسقا كەشىگۋدىڭ الدىن الۋ ءۇشىن ۇيىڭىزدەن ەرتەرەك ءارى جىلى كيىنىپ شىققاندارىڭىز دۇرىس، - دەدى ايدىن ايدار ۇلى.
قار تازالاۋ جۇمىستارى قالاي جۇرگىزىلەدى؟
جۋرناليستەردىڭ قويعان ساۋالىنا الماتى قالاسى كوممۋنالدىق ينفراقۇرىلىمدى دامىتۋ باسقارماسى كورىكتەندىرۋ ءبولىمىنىڭ باس مامانى سەرگەي ۆيكتوروۆ جاۋاپ بەردى:
– قار تازالاۋ تەحنولوگياسى بويىنشا تازالىق جۇمىستارى باستالماس بۇرىن، الدىمەن كوشەلەرگە كوكتايعاققا قارسى ارنايى تەحنيكالىق تۇز قوسپالارى سەبىلەدى. بۇل جۇمىستار قاردىڭ اسفالت جابىنىنا جابىسىپ، قاتىپ قالماۋى ءۇشىن جۇرگىزىلەدى. سوندىقتان قار جاۋا باستاعان كەزدە، «گيدرومەتتىڭ» ەسكەرتپەلەرىنە سايكەس، بەلگىلەنگەن ورىنداردا تۇز، قۇم سەكىلدى قوسپا سەبەتىن ارنايى تەحنيكالار الدىن الا دايىن تۇرادى. ءار تەحنيكا وزىنە بەلگىلەنگەن باعىت بويىنشا جۇمىس جاسايدى. ارنايى قوسپالار سەبىلگەننەن كەيىن جولدارداعى قارلار ەري باستايدى. مىنە، وسى كەزدە كوشەلەردەگى تازالىق جۇمىستارى باستالادى. كەيدە قالا تۇرعىندارىنان كوشەلەر قاردان تازالانباي جاتىر دەپ كوپ شاعىم ءتۇسىپ جاتادى. قار تازالاۋ وڭاي جۇمىس ەمەس. سوندىقتان ءبىز الماتىلىقتاردان جۇمىسشىلارعا مەيلىنشە تۇسىنىستىكپەن قاراۋدى سۇرايمىز، - دەيدى ول.
باس ماماننىڭ ايتۋىنشا، ەگەر قار قالىڭ جاۋسا، قوسپالاردى سەبۋ جۇمىستارى ءار 5 مينۋت سايىن قايتالانادى. جۇمىسشىلار قارلاردى الدىمەن سىپىرىپ، كوشە بويلارىنا ءۇيىپ شىعادى. سودان كەيىن بارىپ قانا ارنايى تەحنيكالارعا تيەلىپ، قالا سىرتىنا شىعارىلادى. جالپى، قالانىڭ كوممۋنالدىق قىزمەتتەرى مەگاپوليستى قاردان تازالاۋعا ارنالعان تەحنيكامەن تولىق قامتاماسىز ەتىلگەن. باس مامان ەگەر قالادا قار شامادان تىس جاۋاتىن بولسا، قۇرىلىس كومپانيالاردىڭ كومەگىنە جۇگىنەمىز دەيدى. ايتۋىنشا، قۇرىلىس كومپانيالارىنىڭ كولىكتەرى قىس كەزىندە كوبىنەسە بوس تۇرادى. سول سەبەپتى ولار بىزگە 150-گە جۋىق ساموسۆال، 100-گە جۋىق جۇمىسشىلارىمەن كومەكتەسۋگە دايىن. ارنايى كەلىسىمشارتقا وتىرعان.
سالا ماماندارىنىڭ ايتۋىنشا، الماتىدا قار تازالاۋ جۇمىستارىمەن 10 مەردىگەر كومپانيا اينالىسادى. 969 ارنايى تەحنيكا مەن 1400 جول جۇمىسشىسى بار. ادەتتە ولار كۇندىز جانە تۇنگى ۋاقىتتا ەكى اۋىسىم بويىنشا جۇمىس ىستەيدى. ءبىراق، قازىرگى جاعدايعا بايلانىستى تاۋلىك بويى جۇرگىزىلەتىن جۇمىس كەستەسىنە اۋىستىرىلعان.
– ەرتەڭ، بۇرسىگۇنى قالادا قالىڭ قار جاۋادى دەپ كۇتىلۋدە. سوندىقتان تازالىقشىلار ءۇشىن ۇزدىكسىز جۇمىس كۇتىپ تۇر. جول جۇمىسشىلارى ءۇشىن بارلىق جاعداي جاسالعان. وندىرىستىك بازا اۋماعىندا ارنايى تىنىعاتىن بولمە بار. وندا جۇمىسشىلارعا ارناپ اسپازدار ىستىق تاعامدار ازىرلەيدى، - دەيدى س.ۆيكتوروۆ.
ايتا كەتەيىك، اۋدان اكىمدىكتەرىمەن باسقارما ماماندارى بىرىگىپ، قالانىڭ نەگىزگى ماگيسترالدىق كوشەلەرىندەگى قارلار 3 جۇمىس كۇنى ىشىندە تولىعىمەن قالا سىرتىنا شىعارىلادى. جالپى، كوكتايعاقتىڭ الدىن الۋ ماقساتىندا كوممۋنالدىق قىزمەتتەر جولداردى قاردان تازارتۋعا 969 تەحنيكا (ونىڭ ىشىندە قۇمشاشقىش، سامسوسۆال) مەن 1400 جول جۇمىسشىسى جۇمىلدىرىلادى.
ايتا كەتەيىك، الماتىدا سوڭعى رەت قالىڭ قار 2016 جىلى جاۋىپتى.