بيىل رامازان ايى 23 ناۋرىزدا باستالىپ، 21 ساۋىردە اياقتالادى. بۇل تۋرالى وڭىرلىك كوممسنيكاسيالار الاڭىندا الماتى قالاسىنىڭ باس يمامى تولەبي قاجى وسپان مالىمدەدى، دەپ حابارلايدى almaty-akshamy.kz
«بارشاڭىزدى كۇللى مۇسىلمان قاۋىمى اسىعا كۇتكەن قاسيەتتى رامازان ايىنىڭ كەلۋىمەن شىن جۇرەكتەن قۇتتىقتايمىن! 14 ناۋرىز كۇنى ەلوردادا باس ءمۇفتي ناۋرىزباي قاجى تاعان ۇلى ب ا ق وكىلدەرىنىڭ قاتىسۋىمەن باسپا ءسوز ءماسليحاتىن وتكىزدى. بيىل رامازان ايى 23 ناۋرىزدا باستالىپ، 21 ساۋىردە اياقتالاتىنىن ەستەرىڭىزگە سالعىمىز كەلەدى. ءساۋىردىڭ 17-نەن 18-نە قاراعان ءتۇن – ءقادىر ءتۇنى. 21 ءساۋىر – ورازا ايت مەرەكەسى»، - دەپ حابارلادى ول.
بيىل ءپىتىر ساداقا مولشەرى 535 تەڭگە بولىپ بەكىتىلدى.
سونداي-اق يمام الماتىلىق كاسىپكەرلەردى ەلىمىزدىڭ باس ءمۇفتيىنىڭ الەۋمەتتىك ماڭىزى بار تاۋارلار مەن ازىق-تۇلىك باعاسىن مۇمكىندىگىنشە 10 پايىزعا دەيىن تومەندەتۋ تۋرالى ۇندەۋىن قولداۋعا شاقىردى.
«وسى ءساتتى پايدالانىپ، بارشا قاۋىمعا قاسيەتتى رامازان ايىندا اراق-شاراپ ىشىلمەسە جانە دۇكەندەردە ساتىلماسا، مۇمكىندىگىنشە قۇدايى استار كەشكى اۋىزاشار ۋاقىتىندا وتكىزىلسە دەگەن تىلەگىمىزدى جەتكىزەمىن»، - دەپ تولىقتىردى ول.
سونىمەن بىرگە، الماتىدا قاسيەتتى رامازان اتاپ ءوتۋدىڭ جوسپارى بەكىتىلگەنى بەلگىلى بولدى.
بيىل قالاداعى 54 مەشىتتىڭ 50-ىندە تاراۋيح نامازىندا قۇران حاتىم تۇسىرىلەدى. قالعان 4 مەشىتتە، اتاپ ايتساق: مەدەۋ اۋدانى «يسميحان» مەشىتى، ناۋرىزباي اۋدانى «كۇليزا انا» مەشىتى، تۇركسىب اۋدانى «ماككا» مەشىتى، تۇركسىب اۋدانى «ار-راحيم» مەشىتىندە تاراۋيح نامازى قۇران حاتىمسىز وقىلادى.
الماتى ورتالىق مەشىتىندە «رامازان شاتىرى» قۇرىلىپ، كۇندەلىكتى 500 كىسىگە اۋىزاشار داستارحانى جايىلماق. سونداي-اق، قالا مەشىتتەرىندە دە اۋىزاشار بەرىلەدى.
بيىلعى جىلدى قمدب «يسلام جانە ىزگى قوعام» جىلى دەپ جاريالاعاندىقتان، ورازا ايىندا «رامازان – ىزگىلىك ايى» اياسىندا ءتۇرلى شارالار: كەزدەسۋ، سەمينار، دوڭگەلەك ۇستەل، سۇحبات، ۋاعىز-ناسيحات، قايىرىمدىلىق، ت.ب. ۇيىمداستىرىلماق. سونداي-اق، الماتى تۇرعىندارى اراسىندا «جاراپازان-Party» بايقاۋى وتەدى.