25 قازان – رەسپۋبليكا كۇنى ۇلى وتان سوعىسىنىڭ ارداگەرى قامبار سارسەنوۆ 101 جاسقا تولدى، - دەپ حابارلايدى Aqshamnews.kz قورعانىس مينيسترلىگىنە سىلتەمە جاساپ.
قاريانى قوس مەرەكەمەن دەسانتتىق-شابۋىلداۋ اسكەرلەرىنىڭ قولباسشىلىعى، مەدەۋ اۋداندىق قورعانىس ىستەرى جونىندەگى باسقارماسىنىڭ اسكەري قىزمەتشىلەرى جانە «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى الماتى قالالىق فيليالى ءتوراعاسىنىڭ ورىنباسارى وتستاۆكاداعى پولكوۆنيك تولەگەن مۇستافين قۇتتىقتاپ باردى.
قامبار سارسەنوۆكە قورعانىس ءمينيسترىنىڭ اتىنان وتان الدىنداعى ەڭبەگى ءۇشىن العىس بىلدىرگەن قۇتتىقتاۋ حاتى تابىستالدى.
ارداگەر كەلگەن قوناقتارعا ىقىلاس تانىتىپ، بارشا قازاقستاندىقتاردى رەسپۋبليكا كۇنىمەن قۇتتىقتادى. مايدان دالاسىندا اۋىر سىناقتاردى باستان وتكەرگەن قارت جاۋىنگەر ەلگە اماندىق، وتباسىلارعا باق-بەرەكە، قازاقستانعا گۇلدەنۋ مەن اشىق اسپان تىلەدى.
قامبار سارسەنوۆ 1924 جىلعى 25 قازاندا قوستاناي وبلىسىندا دۇنيەگە كەلگەن. 1942 جىلى اسكەر قاتارىنا شاقىرىلىپ، وقۋ-جاتتىعۋدان كەيىن مايدانعا اتتانعان. ول بەلارۋس، لاتۆيا جانە ليتۆا جەرلەرىندە شايقاسىپ، كەنيگسبەرگتى الۋ وپەراسياسىنا قاتىسقان، ءۇش رەت جارالانعان.
قامبار سارسەنوۆ I، II دارەجەلى وتان سوعىسى، II، III دارەجەلى داڭق جانە «قىزىل جۇلدىز» وردەندەرىمەن، سونداي-اق كوپتەگەن مەدالدارمەن ماراپاتتالعان. ارداگەر ۆيتەبسك قىزىل تۋ وردەندى، سۋۆوروۆ وردەندى 51-اتقىشتار ديۆيزياسىنىڭ 30-جەكە بارلاۋ روتاسىندا قىزمەت ەتىپ، «قارسىلاستى» ۇستاپ العانى ءۇشىن ەكى وردەنمەن ناگرادتالعان.
سوعىستان كەيىن قامبار سارسەنوۆ ىشكى ىستەر ورگاندارىندا قىزمەت اتقارىپ، كەيىن الماتىنىڭ ەنەرگەتيكا سالاسىندا ۇزاق جىل ەڭبەك ەتكەن.