كۇدىكتى قاماۋعا الىندى.
الماتىدا «اننا» قارۋ-جاراق دۇكەنىن توناۋعا قاتىسقان تاعى ءبىر ادام ۇستالدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
«5 قاڭتاردا س.ەسىمدى ازامات قارۋ-جاراق دۇكەنىن توناۋعا قاتىسقان. اتاپ ايتقاندا، دۇكەننىڭ ەسىكتەرىنە ورناتىلعان توردى سىندىرۋ ءۇشىن تروس بايلانعان ۆاز-2114 اۆتوكولىگىن جۇرگىزگەن. وسى زاڭسىز ارەكەتتەردىڭ ناتيجەسىندە كۇدىكتى ەكى تەگىس ۇڭعىلى جانە ەكى مىلتىق يەمدەنگەن. قازىرگى ۋاقىتتا ونىڭ جاپپاي تارتىپسىزدىكتەر مەن قارۋلى شابۋىلدارعا قاتىسقانى دا تەكسەرىلۋدە. ەستەرىڭىزگە سالا كەتەيىن، سول كۇنى قالادا ءبىر مەزگىلدە جەتى قارۋ-جاراق دۇكەنىنە شابۋىل جاسالدى، ناتيجەسىندە قىلمىسكەرلەر 1 347 قارۋدى، ونىڭ ىشىندە 501 مىلتىق، 807 تەگىس ۇڭعىلى جانە 39 گاز-تراۆماتيكالىق قارۋدى، سونداي-اق وق-دارىلەر تونالدى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.
ۇرلانعان قارۋ كۇدىكتىنىڭ ۇيىنەن تاركىلەندى. ايتپاقشى، ول بۇعان دەيىن بوتەننىڭ مۇلكىن ۇرلاعانى ءۇشىن سوتتى بولعان.
«5 قاڭتار كۇنى مەن ۇيدەن شىقتىم. بەس بەيتانىس ادام كولىگىمدى توقتاتىپ: “ءجۇر، اعا، كەتتىك. ءبىز ساعان جول كورسەتەمىز” دەپ كولىككە ءمىنىپ الدى. ءبىز قارۋ-جاراق ساتاتىن دۇكەنگە كەلگەن ەكەنبىز. ولار مەنىڭ كولىگىمە تروس بايلادى جانە تارتۋدى بۇيىردى. تەرەزەلەرى، ەسىكتەرى سىنعان. بۇل بەلگىسىز بىرەۋلەر كولىك ىشىنە ەكى اۆتوماتتى اكەلدى، جۇك سالعىشقا ەكى مىلتىقتى لاقتىردى. سوسىن مەن وسى قارۋمەن كەتىپ قالدىم»، – دەدى كۇدىكتى.