الماتىدا قارت ادامداردىڭ سەنىمىنە كىرىپ، اقشا جىمقىرىپ كەلگەن «الەۋمەتتىك قىزمەتكەر» ۇستالدى

الماتىدا ءوزىن «الەۋمەتتىك قىزمەتكەر» رەتىندە تانىستىرعان ايەل ادام قارتتاردى الداپ كەلگەن.

«الەۋمەتتىك قىزمەتكەر» ەگدە جاستاعىلاردىڭ سەنىمىنە كىرىپ، اقاشالارىن جىمقىرىپ كەتكەن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«وسى قىلمىستاردى جاسادى دەگەن كۇدىكپەن الماتى وبلىسىنىڭ 38 جاستاعى تۇرعىنى ۇستالدى. جابىرلەنۋشىلەردىڭ ايتۋىنشا، ايەل پاتەرگە كىرىپ، ءوزىن الەۋمەتتىك قىزمەتكەرمىن دەپ تانىستىرىپ، قانداي دا ءبىر جاردەماقى الامىن دەگەن جەلەۋمەن ءىرى كولەمدە اقشا ايىرباستاپ بەرۋدى سۇراعان، اڭگىمەلەسۋشى بولمەگە كىرىپ كەتكەن كەزدە، ول اقشانى ۇرلاعان. كەلتىرىلگەن زالال ءارتۇرلى سومانى قۇرادى: ءبىر زەينەتكەر اس ۇيگە بارىپ كەلگەنشە، قاسكوي 1 ميلليون تەڭگەنى ۇرلاپ، بارلىق اقشانى جەكە قاجەتتىلىكتەرىنە جۇمساعان. قازىرگى ۋاقىتتا ۇستالعانعا قاتىستى ەكى بىردەي ەپيزود دالەلدەندى»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.

ەكى جابىرلەنۋشى – 1929 جانە 1930 جىلى تۋعان زەينەتكەرلەر كۇدىكتىنى تانىدى. ءبىراق پوليسيا قىزمەتكەرلەرى جابىرلەنۋشىلەردىڭ كوپ بولۋى مۇمكىن ەكەندىگىنە سەنىمدى.

سۋرەتتە كورسەتىلگەن ايەلدىڭ قىلمىستىق ارەكەتىنەن زارداپ شەككەن ازاماتتاردى پوليسيا مىنا تەلەفون نومىرلەرى ارقىلى حابارلاسۋلارىن سۇرايدى: 8-708-707-92-02؛ 8-705-555-77-63؛ 8-775-719-27-27.