الماتىدا قارجى پيراميداسىنىڭ ۇيىمداستىرۋشىلارى قاماۋعا الىندى

قارجى پيراميداسىنا قاتىسى بار تاعى ءۇش ادام انىقتالدى.

قارجى پيراميداسىنىڭ ءتورت ۇيىمداستىرۋشىسى قاماۋعا الىندى، دەپ حابارلايدى Almaty-akshamy.kz الماتى پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«اڭگىمە «Mudaraban Capital» سەرىكتەستىگىنىڭ قاتىسۋشىلارى – ش. جانە ت. ەسىمدى ازاماتتار جايلى بولىپ وتىر. ولارعا قاتىستى سوت بۇرىن بۇلتارتپاۋ شاراسى رەتىندە «كەپىل» سانكسياسىن بەرگەن. سونداي-اق م. جانە ك.ەسىمدى ازامات سوتقا دەيىنگى تەرگەۋ بارىسىندا ءۇيقاماققا الىنعان»، - دەدى پوليسيا دەپارتامەنتى باستىعىنىڭ ورىنباسارى رۇستەم ءابدراحمانوۆ.

ايتۋىنشا، ولار الماتى قالالىق پوليسيا دەپارتامەنتىنىڭ تەرگەۋ باسقارماسى قازاقستان قىلمىستىق كودەكسىنىڭ 217-بابى 3-بولىگى بويىنشا تەرگەپ جاتقان قىلمىستىق ءىس بويىنشا كۇدىكتى دەپ تانىلدى.

قىلمىستىق ءىس ءبىر توپ ازاماتتىڭ «ASTEX.KZ» ج ش س، «ACD Technology» ج ش س لاۋازىمدى تۇلعالارىنىڭ قارجىلىق پيراميدا قۇرۋ جانە ونى باسقارۋ دەرەگى بويىنشا ۇجىمدىق ارىز نەگىزىندە الماتى قالالىق پوليسيا دەپارتامەنتىندە تىركەلدى.

2019 جىلدىڭ اقپانىنان 2021 جىلدىڭ قاڭتارىنا دەيىن اتالعان ءجشس-نىڭ لاۋازىمدى تۇلعالارى جەكە جانە زاڭدى تۇلعالارمەن مەملەكەتتىك ساتىپ الۋلارعا قاتىسۋ ءۇشىن قاجەت دەگەن جەلەۋمەن قاراجات تارتۋ ءۇشىن بىرلەسكەن قىزمەت تۋرالى كەلىسىمدەر جاساسقانى انىقتالدى.

ەكىجاقتى قۇجاتقا سايكەس، فيرمالار اي سايىن ءاربىر سالىمشىعا تولەگەن جارنا سوماسىنىڭ 20 پروسەنتىن تولەۋگە مىندەتتى بولدى. «ASTEX.KZ» ج ش س 162 سالىمشىدان 5 ميلليارد تەڭگەدەن استام قاراجاتتى باسقا كومپانيا – «MUDARABAN CAPITAL» ج ش س ارقىلى العان.