الماتىدا 2024 جىلى ناۋرىزباي اۋدانىنداعى قارعالى وزەنىنىڭ جاعالاۋىن كوركەيتۋ جۇمىستارى اياقتالدى. بۇل تۋرالى الماتى اكىمى ەربولات دوسايەۆ ناۋرىزباي اۋدانى تۇرعىندارىمەن كەزدەسۋ بارىسىندا حابارلادى.
ونىڭ ايتۋىنشا، جوبا اياسىندا ۇزىندىعى 3،5 كم بولاتىن جاياۋ جۇرگىنشىلەر ايماعى سالىندى، بالالار جانە سپورت الاڭدارى ورناتىلدى، اۆتوسۋارۋ جۇيەسى ۇيىمداستىرىلىپ، كوشە جارىعى مەن كوگالداندىرۋ جۇمىستارى جۇرگىزىلدى.
«سونداي-اق بيىل ماۋسىم ايىندا قارعالى وزەنى ارناسىن 6،7 كم قاشىقتىقتا قايتا جاڭارتۋ جانە كوركەيتۋ جۇمىستارى باستالادى. جوبا اياسىندا 2026 جىلدىڭ ماۋسىمىنا دەيىن وزەن ارناسىنىڭ بەتون قابىرعالارىن قايتا قۇرۋ، سۋ وتكىزۋ قۇرىلىستارىن قالپىنا كەلتىرۋ، كوگالداندىرۋ جانە 10 جاياۋ جۇرگىنشى كوپىرىن سالۋ جوسپارلانعان»، – دەدى قالا اكىمى.
بۇعان قوسا، اۋداندا جايلى قالالىق ورتانى دامىتۋ اياسىندا «حالىق قاتىساتىن بيۋدجەت» (حقب) باعدارلاماسى ىسكە اسىرىلۋدا. 2024 جىلى بۇل باعدارلاما اياسىندا جالپى سوماسى 2،5 ملرد تەڭگەگە 40 جوبا جۇزەگە اسىرىلدى.
«بيىل «حالىق قاتىساتىن بيۋدجەت» اياسىندا تۇرعىنداردىڭ 1 370-تەن استام ۇسىنىسىنان ىرىكتەلگەن 34 جوبانى ىسكە اسىرۋعا 2،5 ملرد تەڭگە ءبولىندى. ساۋىر-قىركۇيەك ارالىعىندا 9 قوعامدىق كەڭىستىكتى جانە 6 اۋلا اۋماعىن كوركەيتۋ، 2 اۆتوتۇراق ايماعىن جابدىقتاۋ، 17 جەكە ۋچاسكەنى كوگالداندىرۋ جانە كورىكتەندىرۋ جۇمىستارى جوسپارلانعان»، – دەدى ەربولات دوسايەۆ.
ايتا كەتەيىك، «حالىق قاتىساتىن بيۋدجەت» باعدارلاماسى جايلى قالالىق ورتانى قالىپتاستىرۋدىڭ ءتيىمدى قۇرالىنا اينالدى. سوڭعى ءۇش جىلدا الماتىدا بۇل باعدارلاما اياسىندا 39،1 ملرد تەڭگەگە 938 جوبا جۇزەگە اسىرىلدى. ەربولات دوسايەۆتىڭ تاپسىرماسى بويىنشا 2025 جىلى بۇل ماقساتقا 17،1 ملرد تەڭگە ءبولىندى.