الماتىدا قارعالى وزەنىنىڭ جاعالاۋى اباتتاندىرىلادى

الماتىدا قارعالى وزەنىنىڭ جاعالاۋىن اباتتاندىرۋ جىل سوڭىنا دەيىن اياقتالادى
 
الماتىدا ناۋرىزباي اۋدانىنداعى قارعالى وزەنىنىڭ جاعالاۋىن اباتتاندىرۋ اعىمداعى جىلدىڭ سوڭىنا دەيىن اياقتالادى. بۇل تۋرالى الماتى اكىمى ەربولات دوسايەۆ ناۋرىزباي اۋدانىنىڭ تۇرعىندارىمەن كەزدەسۋ بارىسىندا مالىمدەدى، دەپ حابارلايدى almaty-akshamy.kz
 
اباتتاندىرۋ سەلدەن قورعاۋ بوگەتىنەن جاندوسوۆ كوشەسىنە دەيىنگى ۇزىندىعى 7،7 كم ۋچاسكەنى قامتيدى. جۇمىستار اياسىندا وزەن ارناسىن تازالاۋ، جاياۋ جۇرگىنشىلەر ايماعىن جايلاستىرۋ، سىرتقى جارىقتاندىرۋ جەلىلەرىن ورناتۋ، سۋارۋ جۇيەسىن سالۋ، 6 كوپىر وتكەلى، بالالار ويىن جانە سپورت الاڭدارى، كوشە جيھازدارىن ورناتۋ كوزدەلگەن.
 
سونداي-اق، 3 مىڭ جاپىراقتى جانە قىلقان جاپىراقتى اعاشتار وتىرعىزىلادى.

جوبانىڭ ماڭىزدى بولىگى-بالالار مەن سپورت الاڭدارى، جاياۋ ءجۇرۋ جولدارى جانە وزەن جاعاسىندا دەمالۋ مۇمكىندىگى بار جاڭا قوعامدىق كەڭىستىك قۇرۋ. بالالارعا ارنالعان قۇمسالعىشتار مەن سۋ ايماقتارىن، سونداي-اق ورىندىقتارى مەن ۇستەلدەرى بار اتا-انالارعا ارنالعان دەمالىس ايماقتارىن قۇرۋ جوسپارلانۋدا.

 
تروتۋاردى جابىنىڭ  جوسپارلانعان الاڭى 3،7 مىڭ شارشى مەتردى قۇرايدى، تۇراق الاڭى – 2 مىڭ شارشى مەتردەن استام، كوگالداندىرۋ-3،8 گەكتاردان استام. كەلۋشىلەردىڭ جايلىلىعى ءۇشىن 135 ورىندىق پەن ۋرنا ورناتۋ جوسپارلانۋدا.