ءىس-شارا كينو جانە تەاتر رەجيسسەرى ءازىربايجان مامبەتوۆتىڭ 90 جىلدىعىنا ارنالعان
مۇحتار اۋەزوۆ اتىنداعى قازاق ۇلتتىق دراما تەاترىندا «قارا شاڭىراق – 2022» اتتى فەستيۆالى باستالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءىس-شارا بيىل كسرو جانە قازاقستاننىڭ حالىق ءارتىسى، كينو جانە تەاتر رەجيسسەرى ءازىربايجان مامبەتوۆتىڭ 90 جىلدىعىنا ارنالعان. جىل سايىن ۇيىمداستىرىلاتىن فەستيۆالدە تەاتردىڭ ءبىر ماۋسىمىندا شىققان جاڭا سپەكتاكلدەرگە تالداۋ جاسالادى. ماقساتى – جاڭا قويىلىمداردىڭ ساپاسىن، اكتەرلەردىڭ شەبەرلىگىن باعالاۋ. فەستيۆال 11 جەلتوقسانعا دەيىن جالعاسادى.
«اكتەرلەر ۇزدىكسىز ىزدەنۋى قاجەت. ىزدەنىس توقتاعان كەزدە، اكتەرلىك ونەر دە توقتاپ قالادى. ال ونى باعالاۋ تەاتر سىنشىلارى ءۇشىن دە، ءبىز ءۇشىن دە قاجەت. قاي باعىتتا بارا جاتىرمىز؟ قانداي اكتەرلىك جەتىستىگىمىز بار، قانداي ولقىلىعىمىز بار؟ سونى سارالاۋىمىز كەرەك»، – دەدى م. اۋەزوۆ اتىنداعى قازاق ۇلتتىق دراما تەاترىنىڭ قويۋشى رەجيسسەرى اۋباكىر راحيموۆ.
اكەمتەاتر ۇجىمى ءازىربايجان مامبەتوۆكە ارنالعان كورمە دە ۇيىمداستىرعان. وندا ونەر ورداسىنىڭ مۋزەيىندە ساقتالعان 100-گە جۋىق فوتوسۋرەت پەن افيشالار ۇسىنىلعان. قوعام قايراتكەرىنىڭ تاريحي سپەكتاكلدەردەگى ساحنالىق وبرازى، مايلى بوياۋمەن بەينەلەنگەن پورترەتتەرى قويىلعان.
«قۇندى، تاريحي كەرەمەت جادىگەر قولىمىزعا ءتيدى. 1984 جىلى ماسكەۋدەگى ۆاحتانگوۆ تەاترىندا ءازىربايجان مامبەتوۆتى شاقىرىپ، شىڭعىس ايتماتوۆتىڭ «عاسىردان دا ۇزاق ءتۇن» سپەكتاكلى قويىلعان ەكەن. سول كەزدەگى افيشا بىزگە جەتىپ وتىر»، – دەدى م. اۋەزوۆ اتىنداعى قازاق ۇلتتىق دراما تەاترى مۋزەيىنىڭ جەتەكشىسى نارگيز تامابەك قىزى.