الماتىدا قار تازالاۋ جۇمىستارى ءجۇرىپ جاتىر

1463 جول جۇمىسشىسى جۇمىلدىرىلدى.

كوكتايعاقتىڭ الدىن الۋ ماقساتىندا الماتىدا قار تازالاۋ جۇمىستارى جۇرگىزىلىپ جاتىر، دەپ حابارلايدى Almaty-akshamy.kz. 

الماتى قالاسىندا 15-18 سم (08:00-دەگى جاعداي بويىنشا)، تاۋ بوكتەرىندەگى اۋدانداردا 22-30 سم، تاۋلى جەرلەردە 45 سم دەيىن قار جاۋدى.

كوكتايعاقتىڭ الدىن الۋ ماقساتىندا ساعات 00.00-دەن باستاپ جولدارعا كوكتايعاققا قارسى ماتەريالدار سەبىلدى. تۇنگى ساعات 03.30-دان باستاپ جول پوليسياسىنىڭ پاترۋلدىك ماشينالارىنىڭ ەرىپ جۇرۋىمەن قار كۇرەۋ كولوننالارى ۇيىمداستىرىلدى. تاڭەرتەڭگى «قاربالاس ساعاتتا» اۆتوكولىكتى كەدەرگىسىز وتكىزۋدى ۇيىمداستىرۋ ءۇشىن ماگيسترالدى كوشەلەردە جانە قالانىڭ جوعارعى بولىگىندە ءۇش رەت قار كۇرەۋ جۇمىستارى جۇرگىزىلدى.

تروتۋارلاردى، جاياۋ جۇرگىنشىلەر ايماقتارىن، قوعامدىق كولىك ايالدامالارىن، ورتاق پايدالانۋ ورىندارىن مەحانيكالاندىرىلعان ادىسپەن جانە قولمەن تازالاۋ جۇمىستارى كۇشەيتىلدى. 

ساعات 08.00 جاعداي بويىنشا 330 تەكشە مەتر قار شىعارىلدى.

قار تازالاۋعا بارلىعى 616 بىرلىك ارنايى تەحنيكا، 1463 جول جۇمىسشىسى جۇمىلدىرىلدى، 2950 توننا كوكتايعاققا قارسى ماتەريالدار پايدالانىلدى.

 اۋداندىق اكىمدىكتەردە جۇمىس بارىسىن باقىلاۋ بويىنشا تاۋلىك بويعى كەزەكشىلىك ۇيىمداستىرىلدى. 

"قازگيدرومەتتىڭ" بولجامى بويىنشا، قار جاۋۋ 15 اقپاندا كۇننىڭ ءبىرىنشى جارتىسىندا اياقتالادى. اۋا تەمپەراتۋراسى 15 اقپاندا كۇندىز 0-3 گرادۋس اياز بولادى.