بۇگىن قالامىزدا قار قالىڭ جاۋدى. قالالىق اكىمدىكتىڭ مالىمەتىنشە تاڭعى ساعات 04:00-دەن 07:00-گە شەيىن قالىڭدىعى 10 سم قار جاۋعان. قالامىزدىڭ كوشەلەرىن ءتۇن دەمەي كوممۋنالدى قىزمەتكەرلەر تازالاۋعا كىرىستى، - دەپ حابارلايدى Almaty aqshamy.
تاڭەرتەڭ قالا تۇرعىندارى جۇمىسقا، وقۋشىلار مەكتەپگە شىققاندا قاردىڭ جاپالاقتاپ جاۋعانىن كورگەن بولار. سول قار تاڭعى ساعات 7 الدە 8 دە جابا باستاعان جوق. ساعات 04:00 دە باستاعان. ءسىز كورگەن قاردىڭ كولەمى ودان دا كوپ بولعان. ءتۇن دەمەي كوممۋنالدى قىزمەت قاردى تازالادى. يا باستاپقىدا بۇكىل قالانى قامتۋ مۇمكىن بولماعان بولار. سەبەبى قالانىڭ اۋماعى ۇلكەن. سوعان قاراماستان تىنباي ەڭبەك ەتىپ تۇسكە قاراي كوشەلەر تازاردى.
سۋرەتتى تۇسىرگەن اقتولقىن تۇرلىعازى
بۇل جۇمىستى كورسەتۋ ماقساتىندا جۋرناليستەرگە پرەسس-تۋر ۇيىمداستىرىلدى. پرەسس-تۋر الماتى قالاسى كوممۋنالدىق ينفراقۇرىلىمدى دامىتۋ باسقارماسىنىڭ ورىنباسارى دۋلات اشكەنوۆ پەن مەردىگەرلىك ۇيىمدار وكىلدەرىنىڭ قاتىسۋىمەن ءوتتى. دۋلات اشكەنوۆتىڭ سوزىنشە قار تازالاۋعا 452 بىرلىك ارنايى تەحنيكا، ونىڭ ىشىندە 174 شاعىن كولەمدى تەحنيكا مەن 1183 جۇمىسشى جۇمىلدىرىلعان.
اكىمشىلىك تاراپىنان جۇمىسشىلاردى تاسىمالداۋ ماسەلەسى دە جولعا قويىلعان. اسەمحان ەسىمدى جۇمىسشى ەڭبەكشىقازاق اۋىلىنان ەكەن. جۇمىسشى اپامىزدىڭ سوزىنشە جۇمىس كولىگىمەن تاسىمال جولعا قويىلعان.