الماتى قالاسىندا تاڭعى ساعات 5-تەن باستاپ قار جاۋا باستادى، ول 1 اقپانعا قاراعان تۇنگە دەيىن جالعاسادى. «قازگيدرومەت» رمك بولجاۋىنشا جاۋىن-شاشىن مولشەرى 8-9 مم-گە دەيىن جەتۋى مۇمكىن، دەپ حابارلايدى aqshamnews.kz
كوكتايعاقتىڭ الدىن الۋ جانە جول قاۋىپسىزدىگىن قامتاماسىز ەتۋ ماقساتىندا قار جاۋار الدىندا جولدار 180 م³ سۇيىق رەاگەنتپەن وڭدەلدى. جولعا قۇم-تۇز قوسپاسىن سەبۋگە 152 ارنايى تەحنيكا جۇمىلدىرىلدى، ساعات 17:00-دەگى جاعداي بويىنشا 1250 توننا كوكتايعاققا قارسى ماتەريال پايدالانىلدى.
قاردىڭ جينالىپ قالۋىن تەزدەتىپ جويۋ ءۇشىن ءقاۋىپتى جول ۋچاسكەلەرىندە، ءتۇسۋ جانە كوتەرىلۋ ايماقتارىندا، جولايرىقتاردىڭ بۇرىلىس بولىكتەرىندە 46 جەدەل بريگادا كۇشەيتىلگەن رەجيمدە جۇمىس ىستەۋدە. ولار تاۋلىك بويى كەزەكشىلىك ەتۋدە.
كۇندىزگى ۋاقىتتا قار تازالاۋ جۇمىستارىنا 455 بىرلىك ارنايى تەحنيكا جانە 1060 جول جۇمىسشىسى تارتىلدى. سونداي-اق، جاياۋ جۇرگىنشىلەر جولدارىن، قوعامدىق ورىنداردى، قوعامدىق كولىك ايالدامالارىن جانە جەرۇستى وتكەلدەرىن مەحانيكالاندىرىلعان تازالاۋ ءۇشىن 95 بىرلىك شاعىن كولەمدى تەحنيكا قولدانىلادى.
قالانىڭ بارلىق اۋدان اكىمدىكتەرىندە قار كۇرەۋ جۇمىستارىن باقىلاۋ ءۇشىن تاۋلىك بويى كەزەكشىلىك ۇيىمداستىرىلدى.
«قازگيدرومەت» مالىمەتىنشە، بۇگىن قار كەيدە ورتاشا قارقىنمەن جاۋىپ، كەشكى 20:00-گە دەيىن 5-6 مم-گە دەيىن جەتۋى مۇمكىن. قار 31 قاڭتار كۇنى تاعى جاۋىپ، تاعى 3 مم قوسىمشا جاۋىن-شاشىن ءتۇسۋى ىقتيمال.
30 قاڭتار كۇنى اۋا تەمپەراتۋراسى شامامەن 0°س بولادى. 31 قاڭتارعا قاراعان ءتۇنى تەمپەراتۋرا -6…-8°س-قا دەيىن تومەندەپ، كۇندىز -2…-4°س ارالىعىندا ساقتالادى.
الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسى قالا تۇرعىندارى مەن قوناقتارىن جولدا مۇقيات بولۋعا، جول قوزعالىسى ەرەجەلەرىن ساقتاۋعا جانە جول ءجۇرۋ كەزىندە اۋا رايىن ەسكەرۋگە شاقىرادى.