ىلە الاتاۋى ۇلتتىق ساياباعىنىڭ اۋماعىنان تابىلعان السىرەگەن قار بارىسىنىڭ ءومىرىن ساقتاۋ مۇمكىن بولمادى.
الماتى قالالىق زووباقتىڭ مالىمەتىنشە، 8 جەلتوقسان كۇنى ىلە الاتاۋى ۇلتتىق ساياباعىنىڭ اۋماعىنان السىرەگەن قار بارىسى تابىلعان، دەپ حابارلايدى Almaty-akshamy.kz.
ونىڭ جاعدايى مۇشكىل بولىپ، قاتتى ازىپ، ارىقتاعان. وزىنە جاقىنداعان تەحنيكانىڭ داۋىسىنا دا ءمان بەرمەگەن.
جانۋاردى كەزدەستىرگەن ساياباق قىزمەتكەرلەرى دابىل قاعىپ، دەرەۋ ماماندارعا حابار بەرگەن.
قار بارىسى كەزدەسكەن اۋماققا ىلە الاتاۋى ۇلتتىق پاركىنىڭ ماماندارى، زوولوگيا ينستيتۋتىنىڭ قىزمەتكەرلەرى، الماتى حايۋاناتتار باعىنىڭ ۆەتەرينارلارى ارنايى بارعان.
ىزدەستىرۋ ءساتتى اياقتالىپ، بارىس ساعات 23:50-دە تابىلدى.
«جانۋاردىڭ جاعدايى وتە اۋىر ەكەنى بەلگىلى بولدى. سول جەردە كومەك كورسەتۋ مۇمكىن بولماعاندىقتان، ءدال دياگنوز قويۋ ءۇشىن جانۋاردىڭ دەنەسىنەن زەرتتەۋگە قاجەتتى جاعىندىلار (پتر سىناعى ءۇشىن) جانە قان سىنامالارى الىندى. ماماندار السىرەگەن جانۋاردى الماتى زووباعىنا جەتكىزۋ تۋرالى شەشىم قابىلدادى. وكىنىشكە قاراي، جانۋاردىڭ جاعدايى اسا اۋىر جاعدايدا بولعاندىقتان، حايۋاناتتار باعىنا جەتكىزىلگەن سوڭ، بارىس كوز جۇمدى. بارىسقا ىلە الاتاۋى ۇلتتىق پاركى، زوولوگيا ينستيتۋتى جانە قازاق ۇلتتىق اگرارلىق زەرتتەۋ ۋنيۆەرسيتەتىندەگى ارىپتەستەرمەن بىرگە پاتولوگيالىق-اناتوميالىق ساراپتاما جاسالدى. قاتتى السىرەپ شارشاۋمەن قوسا، جانۋاردىڭ اسقازانىنان كوپتەگەن گەلمينتتەر، پوليەتيلەن پاكەتى تابىلدى. جاسى ۇلعايعان بارىستىڭ تىستەرى توزىپ، تولىق اڭ اۋلاي الماي قالعان. جابايى تابيعاتتىڭ، الاتاۋدىڭ كوركى بولىپ جۇرگەن بارىس كوز جۇمدى. ونى قۇتقارۋ ءۇشىن قولدان كەلگەندى جاساۋعا تىرىستىق. ءبىراق ءبارى كەش بولدى»، - دەلىنەدى زووباقتىڭ حابارلاماسىندا.
الماتى زووباعى وسى وقيعادان ساباق الىپ، قورشاعان ورتاعا، تابيعاتقا قامقورلىق جاساۋعا شاقىردى.
«تابيعات اياسىنا شىققاندا، ادامدار اينالانى لاستاپ، قوقىس تاستاماۋى كەرەك. اسىرەسە، ءتۇرلى تاعامداردىڭ ءيىسى سىڭگەن پوليەتيلەن پاكەتتەر جانۋارلار ءۇشىن وتە ءقاۋىپتى. جانۋارلارعا قامقور بولىپ، ولاردى قۇتقارۋ – بارشامىزدىڭ مىندەتىمىز بەن جاۋاپكەرشىلىگىمىز. ءبىز بىرلەسە وتىرىپ تابيعاتتى ساقتاي الامىز»، - دەپ حابارلادى زووباقتان.