الماتىدا قاڭتار وقيعاسىندا ۇرلانعان قارۋ-جاراق تابىلدى

قارۋ-جاراق دۇكەندەرىن توناعان التى كۇدىكتى ۇستالدى.

الماتى پوليسياسى قاڭتارداعى تارتىپسىزدىكتەر كەزىندە ۇرلانعان قارۋدىڭ ءبىر بولىگىن تاپتى، - دەپ حابارلايدى Almaty-akshamy.kz

«قازاننىڭ اياعىندا الماتىدا پوليسيا قىزمەتكەرلەرى قاڭتار وقيعاسى كەزىندە قارۋ-جاراق دۇكەندەرىن توناۋعا قاتىسقان التى كۇدىكتىنى انىقتاپ، ۇستادى. ولار قارۋدىڭ ءبىر بولىگىن ساتىپ، ال قالعان بولىگىن جاسىرىپ ۇلگەرگەن»، - دەدى ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ورتالىق كوممۋنيكاسيالار قىزمەتىندە وتكەن بريفينگتە.

ول قويما قالانىڭ ءار تۇكپىرىندەگى قاڭىراپ بوس قالعان جەرلەردە انىقتالعانىن ءتۇسىندىردى. قارۋ-جاراقپەن قاتار، وپتيكالىق نىسانا جانە باسقا دا اڭ اۋلاۋ قۇرالدارى تابىلعان.

«3 قاراشادا الماتىدا رىسقۇلوۆ داڭعىلى مەن وڭعارسىنوۆا كوشەسىنىڭ قيىلىسىندا قاڭتار وقيعاسى كەزىندە ۇرلانعان 12 كاليبرلى «بايكال» اڭشى مىلتىعى، «كالاشنيكوۆ» اۆتوماتى، وعان ارنالعان ءوق-دارى، كەسىلگەن شولاق مىلتىق، گراناتا، پنيەۆماتيكالىق تاپانشا، برونجيلەت، رەزەڭكە تاياق، سونداي-اق ءارتۇرلى كاليبرلى 58 پاترون بار سومكە تابىلدى»، - دەدى ءادىلوۆ.