الماتىدا قانشا شەتەلدىك كولىك زاڭداستىرىلدى؟

الماتىدا كولىكتى زاڭداستىرۋعا بەرىلگەن 10 327 مىڭ ءوتىنىشتىڭ 1649-ى راسىمنەن ءوتىپ، ماقۇلدانعان، دەپ حابارلايدى Almaty-akshamy.kz.

بۇل تۋرالى الماتى قالاسى پوليسيا دەپارتامەنتىنىڭ اكىمشىلىك پوليسيا باسقارماسى باسشىسىنىڭ ورىنباسارى بولاتباەك باياتانوۆ حابالادى.

ەسكە سالايىق، 2022 جىلدىڭ 1 قىركۇيەگىنە دەيىن ەلگە اكەلىنگەن جانە تىركەلمەگەن اۆتوكولىكتەردى ءبىرجولعى زاڭداستىرۋ مەملەكەت باسشىسىنىڭ تاپسىرماسىنا بايلانىستى جۇزەگە اسىرىلادى. ەلىمىزدەگى بارلىق مامانداندىرىلعان حقكو-دا 23 قاڭتاردا زاڭداستىرۋ باستالدى.

«زاڭداستىرۋ ەرەجەلەرى ءوتىنىش بەرۋدىڭ ەكى ءادىسىن قاراستىرادى: ارنايى حالىققا قىزمەت كورسەتۋ ورتالىعى ارقىلى جانە «ەلەكتروندىق ۇكىمەت» پورتالى ارقىلى. زاڭداستىرۋدىڭ نەگىزگى شارتتارى: كولىك قۇرالدارىنا 200 000 تەڭگە مولشەرىندە ولاردى باستاپقى مەملەكەتتىك تىركەۋ ستاۆكاسى قولدانىلادى»، - دەدى ب.باياتانوۆ.

بۇل جاعدايدا كولىك قۇرالى كەلەسى تالاپتارعا ساي بولۋى كەرەك:
1. 2022 جىلعى 1 قىركۇيەككە دەيىن قازاقستان رەسپۋبليكاسىنىڭ اۋماعىنا اكەلىنگەن؛
2. ىزدەۋدە جوق؛
3. بۇرىنعى تىركەلگەن جەرى بويىنشا مەملەكەتتىك تىركەۋدەن شىعارىلعان؛
4. كەدەندىك رەسىمدەۋدەن وتكەن.

اۆتوكولىكتى قىسقا مەرزىمدە زاڭداستىرۋعا بولادى. ءوتىنىشتى قاراپ، شەشىم قابىلداۋ مەرزىمى نەبارى 2 كۇن، پولكوۆنيك باياتانوۆتىڭ ايتۋىنشا، الماتىداعى ارنايى حقكو-دا كەزەك جوق.