ساين كوشەسىن ۇزارتۋ مومىش ۇلى كوشەسىنەن كولىك جۇكتەمەسىن 40%-عا تومەندەتۋگە مۇمكىندىك بەرەدى
جاقىن ارادا الماتى ءماسليحاتىنىڭ وتىرىسىندا مەگاپوليستىڭ ءۇش جىلدىق بيۋدجەتىنىڭ جوباسى قارالاتىن بولادى. قالا ءماسليحاتىنىڭ باسپا ءسوز قىزمەتى قانداي ينفراقۇرىلىمدىق جوبالارعا قاراجات ءبولۋ كوزدەلىپ وتىرعانىن حابارلادى.
- ماسەلەن، 2025 جىلى سەيفۋللين داڭعىلى - جانسۇگىروۆ كوشەسىنىڭ قيىلىسىندا جانە رىسقۇلوۆ داڭعىلىنان اقىن سارا كوشەسىنە دەيىنگى ساين كوشەسىنىڭ، سونداي-اق اباي داڭعىلىنىڭ قالا شەكاراسىنا دەيىنگى قيىلىسىنىڭ قۇرىلىسىن اياقتاۋ جوسپارلانعان
- كەلەسى جىلدىڭ شىلدە ايىندا ساين كوشەسىن رىسقۇلوۆ داڭعىلىنان اقىن سارا كوشەسىنە دەيىن جالپى ۇزىندىعى 3،2 كم ۇزارتۋ اياقتالادى، سونىڭ ارقاسىندا مومىش ۇلى كوشەسىنەن كولىك جۇكتەمەسىنىڭ 40% - عا تومەندەۋى كۇتىلۋدە.
- سونداي-اق مامىر ايىندا اباي داڭعىلىنىڭ ب.مومىش ۇلى كوشەسىنەن قالا شەكاراسىنا دەيىنگى ارالىعى پايدالانۋعا بەرىلەدى. ۇزارتۋدىڭ جالپى ۇزىندىعى 5،3 كم قۇرايدى، ەكى جاعىندا التى جولاقتى جول، ۆەلوجولدار مەن تروتۋارلار بار.
- ماۋسىم ايىندا جانسۇگىروۆ كوشەسى مەن سەيفۋللين داڭعىلىنىڭ قيىلىسىنداعى جولايرىعىنىڭ ىرگەلەس اۋماعى اباتتاندىرىلىپ، قۇرىلىستى تولىق اياقتاۋ جوسپارلانۋدا.
- جوبا سەيفۋللين داڭعىلىندا كولىكتىڭ ۇزدىكسىز قوزعالىسىن قامتاماسىز ەتۋ ءۇشىن جالپى ۇزىندىعى 690 مەتر بولاتىن 2 توننەل سالۋدى كوزدەيدى. جانسۇگىروۆ كوشەسى بويىنشا كولىك قۇرالدارىنىڭ ءوتۋى جەر دەڭگەيىندە جۇزەگە اسىرىلاتىن بولادى. سونداي-اق 4 جەر ءۇستى جاياۋ جۇرگىنشىلەر وتكەلى، تروتۋارلار جانە كوگالداندىرۋ قاراستىرىلعان.
بۇگىنگى تاڭدا بارلىق سەزدەرگە اسفالتبەتون جابىنى توسەلدى، ءبىر جەر ءۇستى جاياۋ جۇرگىنشىلەر وتكەلى سالىندى، كارىز جانە بايلانىس جەلىلەرىن قايتا قۇرۋ جۇمىستارى جۇرگىزىلۋدە. سونىمەن قاتار، سەيفۋللين داڭعىلىنداعى «باتىس» جانە «شىعىس» توننەلدەرىنە اسفالتبەتون توسەۋ جۇمىستارى اياقتالدى.
ايتا كەتۋ كەرەك، جولايرىعى پايدالانۋعا بەرىلگەن كەزدە جانسۇگىروۆ كوشەسى بويىنشا وتكىزۋ قابىلەتى 15% - عا، سەيفۋللين داڭعىلى بويىنشا 20% - عا ارتادى دەپ كۇتىلۋدە.