دۇيسەنبى 12 اقپاندا ساعات 09.00-دەن 21.00-گە دەيىن الماتىدا 20 سم-گە دەيىن قالىڭ قار جاۋادى دەپ كۇتىلۋدە، بۇل اقپان ايىنداعى ورتاشا ايلىق جاۋىن-شاشىننىڭ شامامەن 40%- ىن قۇرايدى، دەپ حابارلايدى almaty-akshamy.kz الماتى قالاسى كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
وسىعان بايلانىستى قالانىڭ كوممۋنالدىق قىزمەتتەرى تولىق دايىندىققا كەلتىرىلدى. كوشە-جول جەلىلەرىنەن قار شىعارۋ جۇمىستارى اياقتالدى. قىسقى كەزەڭدە بارلىعى 226 مىڭ م3 قار شىعارىلدى.
12 اقپان كۇنى تاڭەرتەڭ كۇشەيتىلگەن ارنايى تەحنيكا قار تازالاۋعا شىعادى دەپ جوسپارلانۋدا، قاردى تازالاۋعا 600 بىرلىككە دەيىن تەحنيكا جانە 1220 جول جۇمىسشىسى جۇمىلدىرىلاتىن بولادى.
كوكتايعاق قۇبىلىستارىنىڭ الدىن الۋ ماقساتىندا، قار جاۋاتىن نەگىزگى ماگيسترالدىق كوشەلەردى كوكتايعاققا قارسى سۇيىق رەاگەنتپەن الدىن الا وڭدەۋ جوسپارلانۋدا. ديسلوكاسيا ورىندارىندا قار جاۋعانعا دەيىن 172 قۇم تاراتقىشتىڭ كەزەكشىلىگى ۇيىمداستىرىلادى، كوكتايعاقتى بولدىرماۋ ءۇشىن قالا كوشەلەرىنە كوكتايعاققا قارسى ماتەريالدار سەبىلەدى. جاۋعان قاردى تازارتۋ ءۇشىن 15 كولوننا ۇيىمداستىرىلادى، ولارمەن بىرگە جول پوليسياسىنىڭ پاترۋلدىك ماشينالارى ەرىپ جۇرەدى.
تروتۋارلاردى، جالپى پايدالانىلاتىن ورىنداردى، كىرەبەرىستەردى تازالاۋ ءۇشىن الەۋمەتتىك ماڭىزى بار وبەكتىلەرگە 176 شاعىن كولەمدى تەحنيكا بىرلىگى تارتىلاتىن بولادى.
اۋدان اكىمدىكتەرىندە قار تازالاۋ جۇمىستارىنىڭ جۇرگىزىلۋىن باقىلاۋ بويىنشا تاۋلىك بويى كەزەكشىلىك ۇيىمداستىرىلادى.