الماتىدا قالتا ۇرىسى ۋۇي-عا قامالدى.
بىرنەشە رەت سوتتالعان، تۇرعىلىقتى جەرى جوق 35 جاستاعى ەر ادام قالتا ۇرلىعىن جاساعانى ءۇشىن ۋاقىتشا ۇستاۋ يزولياتورىنا قامالدى، دەپ حابارلايدى Almaty-akshamy.kz.
«بوتەننىڭ مۇلكىن بىرنەشە رەت ۇرلادى دەگەن كۇدىككە 35 جاستاعى ا. ەسىمدى ازامات ىلىكتى. ول نەگىزىنەن اۋەزوۆ اۋدانى اۋماعىندا قوعامدىق كولىكتەردەن ۇرلىق جاساپ جۇرگەن. بىردە 45-باعىتتاعى قوعامدىق كولىكتە iPhone تەلەفونىن، ال ودان ەكى ساعات بۇرىن 63-اۆتوبۋستان دا تەلەفوندى ۇرلاپ كەتكەن. جەدەل ىزدەستىرۋ شارالارىنىڭ ناتيجەسىندە كۇدىكتى ۇستالدى. اتالعان دەرەك ق ر قك-نىڭ 188-بابى (ۇرلىق) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. تەرگەۋدىڭ وسى كەزەڭىندە ا.ەسىمدى ازاماتتىڭ ءۇش قالتا ۇرلىعىنا قاتىسى بار ەكەندىگى انىقتالدى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
كۇدىكتى تاعى ءبىر ۇرلىقتى ءىرى سۋپەرماركەتتە جاساعان، ساتىپ الۋشىنىڭ قالتاسىنان 12ء-شى مودەلدەگى iPhone تەلەفونىن سۋىرىپ العان. پوليسيا قىزمەتكەرلەرى ونىڭ قالادا بۇرىن جاسالعان وسىعان ۇقساس قىلمىستارعا قاتىسى بار-جوعىن تەكسەرىپ جاتىر.