قاتىسۋشىلاردى سالتاناتتى ماراپاتتاۋ ءراسىمى ق ر قارۋلى كۇشتەرى ۇلتتىق اسكەري-پاتريوتتىق ورتالىعىنىڭ الماتىداعى فيليالىندا ءوتتى.
ق ر قورعانىس مينيسترلىگىنىڭ سپورت كوميتەتى – ورتالىق سپورت كلۋبىنىڭ بازاسىندا وتكەن سپارتاكياداعا قازاقستاننىڭ بارلىق وڭىرىنەن 14-17 جاس ارالىعىنداعى ۇل-قىزدار قاتىستى. ولار ءۇش شاقىرىمعا شاڭعى تەۋىپ، پنيەۆماتيكالىق مىلتىقتان وق اتتى، جاس جىگىتتەر – بەلتەمىرگە تارتىلىپ، قىزدار – شالقالاپ جاتىپ دەنەنى كوتەرۋ جاتتىعۋلارىن ورىندادى.
سالتاناتتى راسىمگە قاتىسۋشىلاردى قۇتتىقتاي وتىرىپ، ق ر قارۋلى كۇشتەرى ۇلتتىق اسكەري-پاتريوتتىق ورتالىعىنىڭ باستىعى ارمان اسەنوۆ ارميا سپورتشىلارى جانكۇيەرلەرىن تالاي مارتە تاماشا ونەرلەرىمەن تامساندىرىپ، كورنەكى رەكوردتارىمەن قۋانتىپ جۇرگەنىن اتاپ ءوتتى.
«سپورت ءومىرىنىڭ مانىنە اينالعان بالالار ءۇشىن قۋانىشتىمىن. سەندەرگە زور دەنساۋلىق، جاۋىنگەرلىك رۋح جانە وتانىمىزدىڭ يگىلىگى جولىندا جاڭا جەتىستىكتەر تىلەيمىن»، – دەدى ول.
جاس سپورتشىلارعا «جاس سارباز» رەسپۋبليكالىق بالالار-جاسوسپىرىمدەر اسكەري-پاتريوتتىق قوزعالىسىنىڭ ءتوراعاسى مايور مەيىربەك مەڭدىعالييەۆ سپارتاكيادا اتاۋىنىڭ ماعىناسى تەرەڭ ەكەنىن اتاپ ءوتتى.
«قالقان دەگەنىمىز - قورعانىس قۇرالى. بۇل جارىس بولاشاقتا سپورتتى مىندەتتى تۇردە سەرىك ەتىپ، كۇشتى، جىلدام، ەپتى بولاتىن بولاشاق وتان قورعاۋشىلاردىڭ جارىسى. سايىس بارىسىندا سەندەر جاقسى تاجىريبە جينادىڭدار، بۇل جاڭا جەڭىستەر مەن جەتىستىكتەر ءۇشىن بويعا سەنىمدىلىك ۇيالاتادى»، – دەدى ول.
«جاس سارباز» رەسپۋبليكالىق اسكەري-پاتريوتتىق قوزعالىسىنىڭ تاربيەلەنۋشىلەرىن جارىستىڭ اياقتالۋىمەن بەلگىلى سپورتشىلار – قازاق كۇرەسىنەن الەم چەمپيونى مارات بايقامىروۆ، الەم چەمپيوناتىنىڭ قولا جۇلدەگەرى دزيۋدوشى گۋسمان قىرعىزبايەۆ، سامبو مەن دزيۋدودان حالىقارالىق دارەجەدەگى سپورت شەبەرى، ق ر ەڭبەك سىڭىرگەن جاتتىقتىرۋشىسى اسان مامبەتقۇلوۆ جانە سامبودان حالىقارالىق دارەجەدەگى سپورت شەبەرى ارنۇر قۋاتاي قۇتتىقتادى.
سپارتاكيادا قورىتىندىسى بويىنشا التىندى كوماندالىق ەسەپتە اقمولا وبلىسىنىڭ، كۇمىستى – سولتۇستىك قازاقستان وبلىسىنىڭ، قولانى – باتىس قازاقستان وبلىسىنىڭ قۇراماسى ولجالادى.
جاسوسپىرىمدەر اراسىنداعى ءۇش جارىستىڭ قورىتىندىسى بويىنشا جەكە ەسەپتە رومان جەرەبيلو (سولتۇستىك قازاقستان وبلىسى)، ەكىنشى ورىندا نيكيتا ماتيۋشكوۆ (اقمولا وبلىسى)، ءۇشىنشى ورىندا ارتەم سۋركو (باتىس قازاقستان وبلىسى) چەمپيون اتاندى.
قىزدار اراسىندا ماريا ۆوروبيەۆا (اقمولا وبلىسى) جەڭىمپاز اتانسا، تۇعىردىڭ ەكىنشى جانە ءۇشىنشى ساتىلارىنان داريا لاتىپوۆا (قاراعاندى وبلىسى) جانە ۆالەريا نيكيتينا (سولتۇستىك قازاقستان وبلىسى) كورىندى.
ءىس-شارا ۇلتتىق اسكەري-پاتريوتتىق ورتالىعىنىڭ الماتىداعى فيليالىنىڭ شىعارماشىلىق ۇجىمى دايىنداعان كونسەرتپەن اياقتالدى.