الماتى قالاسىنىڭ اكىمى دارحان ساتىبالدى كەشكى ۋاقىتتا شاھاردىڭ نەگىزگى كوشەلەرى مەن نىساندارىن ارالاپ، سىرتقى جانە ساۋلەتتىك جارىقتاندىرۋدى جاڭعىرتۋ جوبالارىنىڭ جۇزەگە اسىرىلۋ بارىسىن كورىپ قايتتى. ساپار كەزىندە ول شااج بويىنداعى كوشە شامدارىنىڭ جەلىسىن جانە ابىلاي حان داڭعىلى №2 بويىنداعى عيماراتتىڭ قاسبەتىن تەكسەردى.
اكىم مۇنداي جوبالاردى جۇزەگە اسىرعاندا تەحنيكالىق تالاپتاردى عانا ەمەس، قالانىڭ كەلبەتىنە كورىك بەرەتىن ساندىك شەشىمدەردى دە نازاردان تىس قالدىرماۋ كەرەكتىگىن ايتتى.
«بىزگە جاي عانا سۇرعىلت مىرىشتالعان باعاندار جەتكىلىكسىز. قالانىڭ وزىندىك ساۋلەتتىك قولتاڭباسىن ايشىقتايتىن، كوز تارتارلىق تىرەكتەر كەرەك»، — دەدى دارحان ساتىبالدى.
شاھار باسشىسىنىڭ ايتۋىنشا، الماتىدا جاڭاشىل يدەيالار مەن تىڭ جوبالىق شەشىمدەر از ەمەس. دەگەنمەن ولاردىڭ ويداعىداي جۇزەگە اسۋى ءۇشىن ساپاعا باسا ءمان بەرىلىپ، جۇمىس كەستەسى قاتاڭ ساقتالۋعا ءتيىس. وسى ماقساتتا جوبالاردىڭ ورىندالۋى مەن ناتيجەسى قاتاڭ باقىلاۋدا بولادى.
ەنەرگەتيكا جانە سۋمەن جابدىقتاۋ باسقارماسىنىڭ مالىمەتىنشە، شااج بويىنداعى ەسكىرگەن 224 شام زاماناۋي، قۋاتى 200 ۆاتت بولاتىن جاڭا شامدارعا اۋىستىرىلدى. ولار جارىق كۇشىن رەتتەۋ جانە قاشىقتان باسقارۋ فۋنكسيالارىمەن جابدىقتالعان. بۇل ەلەكتر قۋاتىن ۇنەمدەپ، تەحنيكالىق جاعدايدى جىلدام قاداعالاۋعا مۇمكىندىك بەرەدى.
ايتا كەتەيىك، بۇگىندە قالانىڭ جارىقتاندىرىلۋ دەڭگەيى 88 پايىزعا جەتىپ وتىر. جىل سوڭىنا دەيىن بۇل كورسەتكىش تولىق 100 پايىزعا جەتكىزىلمەك.
كوشە شامدارىنان بولەك، قالانىڭ ءار اۋدانىندا ساۋلەتتىك جارىقتاندىرۋ جوبالارى دا قولعا الىنعان. مەكتەپتەردىڭ، الەۋمەتتىك جانە سپورتتىق نىسانداردىڭ قاسبەتى، سونداي-اق نەگىزگى كوشەلەر بويىنداعى عيماراتتار ساندىك جارىقپەن كومكەرىلمەك.