2025 جىلعى شىلدە ايىندا وتكەن VI سپورتتىق جاستار ويىندارى شىمكەنت قالاسىنىڭ جاس سپورتشىلارى ءۇشىن ۇلكەن جەتىستىكتەرمەن ەستە قالدى. شىمكەنت قالاسىنىڭ جيناقتاما قۇراماسى ستەند اتۋ مەن وق اتۋ بويىنشا وتكەن جارىستاردا قارسىلاستارىنان وق بويى وزىپ، قوس بىردەي سايىستا كوماندالىق ەسەپتە I-ورىنعا يە بولدى، دەپ حابارلايدى Aqshamnews.kz
2025 جىلعى 21-27 شىلدە ارالىعىندا استانا قالاسىنداعى "Target" اتۋ كەشەنىندە وتكەن VI سپورتتىق جاستار ويىندارى مەن ق ر كۋبوگىنىڭ III كەزەڭىندە ەلىمىزدىڭ 8 وڭىرىنەن كەلگەن 150-دەن استام سپورتشى ب ا ق سىنادى. قاتىسۋشىلاردىڭ شەبەرلىگى مەن دايىندىق دەڭگەيى جوعارى بولعانىنا قاراماستان، شىمكەنت قالاسىنىڭ كومانداسى 13 مەدال (6 التىن، 3 كۇمىس، 4 قولا) يەلەنىپ، ۇزدىك ناتيجە كورسەتتى.
ەكىنشى ورىندى استانا قالاسىنىڭ سپورتشىلارى 8 مەدالمەن (3 التىن، 3 كۇمىس، 2 قولا) ەنشىلەسە، ءۇشىنشى ورىندى الماتى قالاسىنىڭ كومانداسى 9 مەدالمەن (2 التىن، 3 كۇمىس، 4 قولا) قاناعات تۇتتى.
ساراپشىلاردىڭ پىكىرىنشە، ستەند اتۋدان شىمكەنت سپورتشىلارىنىڭ ايقىن باسىمدىق كورسەتۋى – وڭىردەگى سپورتتىق ينفراقۇرىلىم مەن جاتتىقتىرۋشىلار قۇرامىنىڭ جوعارى دەڭگەيىنىڭ ناتيجەسى.
بۇعان دەيىن، 2025 جىلعى 18–25 شىلدە ارالىعىندا الماتى وبلىسىندا ورنالاسقان رگكپ «الماتى» وليمپيادالىق دايارلاۋ ورتالىعى بازاسىندا وق اتۋ بويىنشا VI سپورتتىق جاستار ويىندارى ءوتتى. بۇل جارىس تا ەلىمىزدىڭ سپورت تاريحىندا ايرىقشا ورىن الدى. ەلدىڭ 10 وڭىرىنەن كەلگەن 140 سپورتشى قاتىسقان سايىس رەكوردتىق كورسەتكىشتەرمەن ەرەكشەلەندى.
كوماندالىق ەسەپ بويىنشا شىمكەنت قالاسىنىڭ سپورتشىلارى 38 مەدال (25 التىن، 6 كۇمىس، 7 قولا) يەلەنىپ، تاعى دا كوش باستادى. بۇل – وزگە وڭىرلەردەن الدەقايدا جوعارى ناتيجە.
الماتى قالاسى II-ورىندى 30 مەدالمەن (5 التىن، 17 كۇمىس، 8 قولا) يەلەنسە، پاۆلودار وبلىسىنىڭ كومانداسى 5 مەدال (2 التىن، 3 قولا) الىپ، III-ورىنعا تابان تىرەدى.
شىمكەنت قالاسىنىڭ وق پەن ستەند اتۋدان قاتارىنان ەكى جارىستا دا كوش باستاۋى – بۇل كەزدەيسوقتىق ەمەس. بۇل – جۇيەلى جۇمىس پەن بىلىكتى مامانداردىڭ، سونىمەن قاتار جاستاردىڭ جانكەشتى ەڭبەگىنىڭ جەمىسى. بۇگىندە شىمكەنت قالاسى ەلىمىزدىڭ سپورتتىق كارتاسىندا كوشباسشى ورتالىقتاردىڭ ءبىرى رەتىندە تانىلىپ كەلەدى.
سپورت سالاسىنداعى ساراپشىلاردىڭ ايتۋىنشا، شىمكەنت قالاسىنداعى وليمپيادالىق دايىندىق ورتالىقتارى، جاتتىعۋ بازالارى مەن ماتەريالدىق-تەحنيكالىق قامتاماسىز ەتۋ جۇيەسى – باسقا وڭىرلەرگە ۇلگى بولا الادى.
2025 جىلعى VI سپورتتىق جاستار ويىندارى شىمكەنت قالاسىنىڭ سپورت سالاسىنداعى تابىستى باعىتىن تاعى ءبىر مارتە دالەلدەدى. ستەند جانە وق اتۋدان كورسەتىلگەن جوعارى ناتيجە – بولاشاق وليمپيادا جۇلدەگەرلەرىن تاربيەلەۋدەگى ماڭىزدى قادام. شىمكەنت سپورتشىلارىنىڭ جەڭىسى – تەك ءوڭىردىڭ ەمەس، بۇكىل ەلدىڭ مەرەيى.