الماتىدا قالانىڭ جاڭاجىلدىق باس شىرشاسى جاعىلدى

ءداستۇر بويىنشا ءراسىم قبتۋ عيماراتىنىڭ جانىنداعى «استانا» الاڭىندا ءوتتى 

جاڭا جىلدىڭ باستى سيمۆولىنىڭ بيىكتىگى – 20 مەتر. الماتىنىڭ باس شىرشاسىن جاعۋ راسىمىنە مەگاپوليس اكىمىنىڭ ورىنباسارى ەرجان باباقۇماروۆ قاتىستى، دەپ حابارلايدى اlmaty-akshamy.kz

ەسترادا جۇلدىزدارى قاتىسقان بۇل شارا قالا بويىنشا جاڭاجىلدىق ءىس-شارالاردى باستاۋعا مۇمكىندىك بەردى. مەگاپوليستىڭ بارلىق سەگىز اۋدانىندا 100-دەن استام فوتوايماق ورناتىلعان، ونىڭ ىشىندە شىرشالار، شاعىن ساۋلەت نىساندارى جانە جاڭا جىلدىق بەزەندىرۋدىڭ باسقا دا ەلەمەنتتەرى بار.

سونداي-اق، 21-30 جەلتوقسان ارالىعىندا قالا اكىمدىگىنىڭ قولداۋىمەن «جاڭاجىلدىق كەرۋەن» ۇيىمداستىرىلدى. قالا قوناقتارى مەن تۇرعىندارىن جۇك كولىكتەرىنىڭ كەرۋەنى كۇتەدى: دەكوراسيالار، مىڭداعان جارىقتاندىرۋ، جارىق شوۋلارى، جارقىن فوتوايماقتار جانە ۇلكەن سىيلىقتار جارمەڭكەسى. 30 مىڭ مەتردەن استام جارىق گيرلياندالارى، شامدار مەن قىزىقتى ديزاين ەشكىمدى بەيجاي قالدىرمايدى. جۇك كولىكتەرىنىڭ قوزعالىسى الەۋمەتتىك جەلىلەردە جاريالانادى.

سونىمەن قاتار، كۆي تارالۋىنا قارسى ءىس-قيمىل جونىندەگى قالالىق شتاب كۇردەلى سانيتارلىق-ەپيدەميولوگيالىق احۋالعا جانە "وميكرون" شتامىنىڭ تارالۋ قاۋپىنە بايلانىستى ساقتىق شارالارىن – ماسكا رەجيمىن جانە الەۋمەتتىك قاشىقتىقتى ساقتاۋ قاجەت ەكەنىن ەسكە سالادى. الماتىلىقتارعا ۆاكسينالاۋدى جالعاستىرۋ كەرەك، ال بۇرىن ەگىلگەندەردى قايتا ۆاكسينالاۋ قاجەت. ۆاكسينالاۋ پۋنكتتەرى جۇمىسىن جالعاستىرۋدا.